Astanada «Altaıdan Anadolyǵa» atty derekti fılmniń tusaýkeseri ótti. Túrkııadaǵy qandastar kóshiniń 70 jyldyq tarıhyna arnalǵan fılmniń tusaýkeser rásimine tarıhshylar, zııaly qaýym jáne mádenıet salasynyń ókilderi men jýrnalıster qatysty.
Fılmde Qytaı kommýnısteriniń zorlyq-zombylyǵynan bosyp Tıbet, Úndistan men Pákistan arqyly Túrkııaǵa jetken qandastar taǵdyry baıandalady. Fılm avtory – Azat Rystanbek. Kınokartınany «Otandastar qorynyń» usynysymen «Qazaqstan» ulttyq arnasynyń shyǵarmashylyq toby Túrkııanyń qazaqtar shoǵyrlanǵan aımaqtarynda túsirgen.
Týyndyda Altaıdan Anadolyǵa aýǵan on myńdaǵan qazaqtyń kóshine kýá bolǵan jandardyń estelikteri áserli berilgen. Sonymen qatar túrik ǵalymdarynyń qundy tarıhı zertteýleri de qamtylǵan. Odan bólek, 1952 jyly 13 naýryzda Túrkııanyń sol kezdegi Úkimet basshysy Adnan Menderestiń bastamasymen qabyldanǵan tarıhı qaýly týraly da keńinen aıtylady. Azapty joldy kóp adam shyǵynymen artqa tastap, 1952 jyly Túrkııaǵa áýpirimdep jetken 1 852 qazaqtyń Anadoly jerindegi jańa ortaǵa beıimdelýi, tamyr jaıýy jáne qazirgi kezdegi jaı-kúıi – kartınanyń negizgi mazmuny bolǵan. Shyǵarmashylyq top túsirilim barysynda qazaqtar alǵash qonystanǵan Ystanbuldyń Zeıtinburny jáne Baǵjylar aýdanyna, Nıde aımaǵyndaǵy Altaı aýylyna jáne Ankara, Izmır, Salıhly qalalaryna baryp, kósh kýágerleri Zylıha Qamzaqyzy, Qalııa Ádilbekqyzy, Arystan Shádetuly, Mansur Táıji jáne olardyń urpaqtarymen tildesip qaıtqan.
«Otandastar qory» KeAQ prezıdenti Abzal Saparbekuly men «Qazaqstan» ulttyq arnasynyń Basqarma tóraıymy Lázzat Tanysbaıdyń aıtýynsha, fılm keıingi býynǵa ult tarıhyndaǵy eń uzaq, eń azapty kóshtiń mánin túsindirý, qandastarymyzǵa qurmet bildirý maqsatynda túsirilgen.
Sondaı-aq kartına ult tarıhyndaǵy aıtýly kóshtiń 70 jyldyǵyna jáne Qazaqstan men Túrkııa arasyndaǵy dıplomatııalyq qarym-qatynastyń 30 jyldyǵyna arnalǵan. Derekti fılm «Qazaqstan» ulttyq arnasynan Táýelsizdik kúni qarsańynda kórsetiledi.