Erkin kúres sheberi Laýra Álmaǵanbetova bes aıǵa sozylǵan dopıng daýynan keıin Azııa chempıonatynyń jeńimpazy atandy.
Qazaqstan grek-rım, erkin jáne áıelder kúresi federasııasynyń málimetinshe, 30 qarashada Laýraǵa United World Wrestling uıymynan hat kelipti. Onda «Bishkek Arena» kileminde ótken fınaldyq beldesýde qazaq palýanyn utyp, Azııanyń altyn medalin ıelengen úndistandyq sportshynyń dopıngke qarsy talaptardy buzǵany anyqtaldy dep jazylǵan.
21 memlekettiń sportshylary baq synasqan dúbirli dodada Laýra Álmaǵanbetova kúmis medal alǵan edi. Qola qyrǵyz sportshysyna buıyrǵan.
Qostanaılyq palýan qazir Qaraǵandyda Nurken Ábdirovti eske alýǵa arnalǵan respýblıkalyq týrnırde júr eken.
– Oıda joqta altyn medal alǵanymdy estip, ózim de tańǵalyp jatyrmyn. Biraq Bishkekte úndi palýanyn utýym kerek edi, qýanyshtyń kókesi sol bolar edi. Árıne, sporttyń aty – sport, birde utasyń, birde utylasyń. Altyn alǵanymdy estip týystarym da qýanyp jatyr. Endigi basty maqsatym – kelesi jyly bastalatyn olımpıadalyq irikteý jarystaryna daıyndalý, – deıdi palýan qyz.
Laýra 2004 jyldan beri Sarykól aýdandyq balalar jáne jasóspirimder sport mektebinde jattyǵady. Sport sheberi, Qazaqstan Respýblıkasynyń alty dúrkin chempıony, Azııa chempıonatynyń eki dúrkin kúmis, Álem chempıonatynyń qola júldegeri.
Qazaq palýany endi 57 kılo salmaq dárejesi boıynsha Azııanyń altyn medalin alatyn boldy.
Qostanaı oblysy