Prezıdenti is basqarmasynyń medısınalyq ortalyǵy aýrýhanasynyń dırektory 75 jastaǵy pasıentke operasııa jasady, dep habarlaıdy Egemen.kz QR PIB MOA baspasóz qyzmetine silteme jasap.
QR PIB Medısınalyq ortalyǵynyń aýrýhanasyna shuǵyl tártippen 75 jastaǵy pasıent tústi. Dárigerlerdiń qarap-tekserýi men júrek koronarografııasynyń nátıjesinde «Mıokard ınfarktisi» dıagnozy qoıyldy.
QR PIB Medısınalyq ortalyǵy aýrýhanasynyń dırektory Rýstam Albaev búgin tańerteń 8.45-te osy pasıentke jedel túrde aortokoronarlyq shýnttaý operasııasyn jasady. Operasııa sátti ótti, naýqastyń qazirgi jaǵdaıy qalypty.
«Operasııalyq bólme – basqa bir álem sııaqty. Bul jerdiń atmosferasy bólek, ózine tán rýhy bar. Biz jumys kúnin aıaqtaý úshin ǵana jumys istemeımiz, pasıenttiń ómirin jaqsarta túsý úshin qyzmet atqaramyz. Bizde bir ýaqytta 11 operasııalyq zal jumys isteıdi. Bizdiń mindetimiz – barlyq josparlanǵan operasııalardy naqty belgilengen ýaqytta jasaý. Bizdi shveısarııalyq saǵatpen salystyrýǵa bolady, iske qosylǵan sátten bastap sońyna deıin úzdiksiz jumys isteımiz. Operasııalyq blok ta týra solaı – pasıentterdiń ómirin saqtap qalý jáne densaýlyqty jaqsartý úshin toqtaýsyz jumys isteıdi. Olardyń birinde robottalǵan hırýrgııa boıynsha operasııalar, ekinshisinde – elde balamasy joq bıplan angıografııalyq keshen júıesiniń kómegimen operasııalar jasalady. Blokta anestezıologııa, transfýzıologııa, perfýzıologııa, neırohırýrgııa, kardıohırýrgııa, angıohırýrgııa, arıtmologııa, otorınolarıngologııa, ýrologııa, gınekologııa, jalpy hırýrgııa, oftalmohırýrgııa, koloproktologııa, travmatologııa jáne ortopedııa beıinderi boıynsha 60-tan astam orta jáne kishi medısınalyq personal mamandary men dárigerleri jumys isteıdi», dedi QR Prezıdenti Is Basqarmasy Medısınalyq ortalyǵy aýrýhanasynyń dırektory Rýstam Albaev.
Koronarlyq shýnttaý – ıshemııalyq júrek aýrýyn (IJA) emdeýdiń negizgi mańyzdy ádisteriniń biri. Qazirgi ýaqytta bul patologııany emdeýdiń «Altyn standarty» – mıokard revaskýlıarızasııasy.
Jyl saıyn QR PIB Medısınalyq ortalyǵy aýrýhanasynyń operasııalyq blogynda 5000-nan astam operasııa, ashyq júrekke 300-den astam operasııa jasalady.