Premer-Mınıstrdiń orynbasary Altaı Kólginov Qazaqstan Respýblıkasynyń aýmaǵynda koronavırýs ınfeksııasynyń taralýyna jol bermeý jónindegi vedomstvoaralyq komıssııanyń otyrysyn ótkizdi, dep habarlaıdy Egemen.kz Úkimettiń baspasóz qyzmetine silteme jasap.
Komıssııa jumysyna ortalyq memlekettik organdardyń, «Atameken» UKP ókilderi, sondaı-aq óńirlerdiń basshylary qatysty.
Densaýlyq saqtaý mınıstri Ajar Ǵınııattyń aıtýynsha, elimizde qarasha aıynyń basynan bastap koronavırýspen syrqattanýshylyqtyń ósýi baıqalady. Táýligine KVI+ 235 jáne KVI- 40 jaǵdaıy tirkeledi. Sońǵy aptada syrqattanýshylyq 21%-ǵa artqan (aptasyna 1 001 jaǵdaıdan 1 283-ke deıin).
«Búgingi tańda barlyq óńirler – «jasyl» aımaqta. Sonymen qatar 15 óńirde R kórsetkishi birlikten joǵary, bul ınfeksııanyń taralýynyń ósýiniń belgisi. Bas memlekettik sanıtarlyq dárigerdiń qaýlysyna sáıkes R kórsetkishi 1-den joǵary bolsa, qoǵamdyq oryndarda betperde taǵý usynylady», dedi Ajar Ǵınııat.
Vıse-premer Altaı Kólginov memlekettik organdardyń basshylaryna, ákimdikterge halyqty vaksınalaý jáne revaksınasııalaý jumystaryn jandandyrýdy, halyq arasynda túsindirý jumystaryn kúsheıtýdi tapsyrdy.
Búgingi tańda birinshi komponentpen egilgender jalpy halyqtyń 81,1%-yn quraıdy, ekinshi komponentpen egilgender sany – 79,3%, alǵashqy revaksınasııadan 5,6 mln adam nemese tıisti halyqtyń 70%-y, qaıta revaksınasııadan 1,1 mln adam nemese tıisti halyqtyń 51,9%-y ótti.