Qazaqstan Ulttyq Banki «Saq stıli» aınalymdaǵy bıkolorly monetalaryn aınalymǵa shyǵarady, dep habarlaıdy Egemen.kz Ulttyq banktiń baspasóz qyzmetine silteme jasap.
«Saq stıli» moneta baǵdarlamasynyń ıdeıasy Qazaqstan halqyn monetalar kolleksııasyn jınaýǵa belsendi túrde tartý, mádenı-tarıhı jáne aǵartýshylyq qundylyqtardy alǵa tartý, sondaı-aq otandyq moneta óndirisin tanymal etý bolyp tabylady.
Saq stıli – Eýrazııa dalasynyń keıingi qola jáne erte temir dáýiri mádenıetindegi janýarlardyń beınelerin oryndaýdyń erekshe tásili.
«Saq stıli» monetalarynyń nomınaly 100 teńgelik, massasy 6,45 gramm, dıametri 24,5 mm bolatyn ár túrdiń 1 000 000 (bir mıllıon) danasymen, jalpy taralymy 5 mıllıon danamen uncirculated daıyndaý sapasymen nıbrass/neızılber qorytpasynan jasalǵan aınalymdaǵy bıkolorly monetalardyń bes túri bolady.
«Buǵy». Jalaýly kómbesi. Jetisý (bizdiń dáýirimizge deıingi V-III ǵǵ.). Kóshpendilerdiń dúnıetanymyndaǵy buǵy – tómengi jáne joǵarǵy álemderdi biriktiretin sımvol. «Qanatty barys». Esik qorǵany (bizdiń dáýirimizge deıingi IV-III ǵ. sońy). Qar barysy – erlik pen baılyqtyń sımvoly. «Maska». Shilikti. Shyǵys Qazaqstan (bizdiń dáýirimizge deıingi VIII–VII ǵǵ.) Otbasy – oshaq qasyn qorǵaıtyn úsh keskinniń beınesi – mysyq tektes jyrtqysh, eki arqar jáne ushatyn qus maskasy. «Buǵy túrindegi altyn áshekeı», Jalaýly, Jetisý (bizdiń dáýirimizge deıingi V–III ǵǵ.). Qyzyl buǵy beınesi – molshylyq pen urpaq jalǵastyǵynyń sımvoly. «Búktetilgen barys». Taldy-2. Ortalyq Qazaqstan (bizdiń dáýirimizge deıingi VII ǵ.). Búktetilgen barys fıgýrasyndaǵy saqına pishini – ýaqyttyń aýysymdyq jáne syrtqy álemmen úılesimdilik sımvoly. Bul monetalar aınalymǵa tek ekinshi deńgeıdegi bankter arqyly shyǵarylady. Keıin aınalymdaǵy monetalarmen birge qolma-qol aqsha túrinde paıdalanylady. Bul «Saq stıli» serııasyndaǵy monetalar – zańdy tólem quraly jáne tólemderdiń barlyq túri boıynsha qabyldanýǵa mindetti, ıaǵnı, taýar alǵanda jáne belgili bir qyzmet úshin tólem quraly retinde paıdalanýǵa bolady. Sonymen qatar Qazaqstan Respýblıkasynyń barlyq bankinde bank shottaryna esepke alynýy jáne aýdarylýy, usaqtalýy jáne aıyrbastalýy tıis.Monetalardyń tehnıkalyq jáne naqty ólshemderi (massasy, dıametri, qalyńdyǵy, metall qorytpasy) ózgerissiz saqtalǵan. Tehnıkalyq sıpattamalary jaǵynan olar nomınaly 100 teńgelik monetalarǵa tolyǵymen sáıkes keledi. Sol sebepti «Saq stıli» monetalaryn qabyldaý úshin tólem termınaldary men basqa da kassalyq tehnıkany qosymsha qaıta teńsheý talap etilmeıdi.
«Saq stıli» monetalary Qazaqstan teńge saraıynda daıyndaldy.