Endi elektrondyq eńbek bırjasynda kórsetiletin jumyspen qamtý salasyndaǵy qyzmetterdi smartfonǵa arnalǵan qosymsha arqyly alýǵa bolady. Eńbek jáne halyqty áleýmettik qorǵaý mınıstrligi «Enbek» mobıldi qosymshasy iske qosylǵanyn habarlady, dep jazady Egemen.kz.
Paıdalanýshylar eńbek bırjasynyń saıtymen tolyq sınhrondalǵan «Enbek» mobıldi qosymshasynda ózderin qyzyqtyrǵan bos jumys oryndaryn qarap jáne jumys berýshilerden shaqyrýlar ala alady. Push habarlandyrýlarynyń yńǵaıly múmkindigi túıindeme men jaýaptardy, suhbatqa shaqyrýlardy jáne jumys berýshiniń áńgimelesý nátıjeleri boıynsha sheshimderin qaraý týraly aqparatty ótkizip almaýyna kómektesedi.
«Qosymsha paıdalanýshyǵa túıindemeniń qanshalyqty tolyq toltyrylǵanyn, jumys berýshiniń oǵan nazar aýdarýy úshin taǵy ne qosýǵa bolatynyn aıtady. Al izdenýshini qyzyqtyratyn sala boıynsha jańa bos jumys oryndaryn jiberip almaý úshin izdeý parametrlerin saqtap, qolaıly bos jumys oryndary týraly habarlama alýǵa bolady», dep túsindirdi «ERDO» AQ Jumyspen qamtý salasyndaǵy sıfrlyq qyzmetter departamentiniń dırektory Nıkolaı Brıýhanov.
Sondaı-aq qosymshada jumyssyz retinde tirkelip, jumysynan aıyrylýyna baılanysty áleýmettik tólem alýǵa bolady. Ol úshin elektrondyq sıfrlyq qoltańbanyń bolýy qajet emes, tek mobıldi azamattar bazasynda tirkelý jetkilikti.
«Keleshekte qosymshanyń fýnksıonaldyǵy keńeıip, jańa servıster men qyzmetter qosylady. Qosymsha barlyq paıdalanýshylar úshin tegin jáne PlayMarket jáne AppStore dúkenderinde qoljetimdi», dep qosty Nıkolaı Brıýhanov.