Osy jyly astyq eksportyndaǵy shekteýlerdiń alynyp tastalýy men naryqta jumys isteıtin túrli kompanııalar usynatyn vagondardyń jalǵa alý mólsheriniń aıyrmashylyǵynan ýaqytsha keptelis pen dúrbeleń baıqalǵany ras. Sebebi astyq jóneltýshiler men vagon ıeleri arasyndaǵy iskerlik baılanys temirjol ákimshiliginiń qatysýynsyz retteledi. Bul rette atalǵan máseleni naryq qatysýshylary ózara sheshti, dep habarlaıdy Egemen.kz IIDM baspasóz qyzmetine silteme jasap.
Qazir Qazaqstannyń astyq tasymaldaýshylaryna arnalǵan tehnıkalyq park 10,5 myńnan asady. Onyń ishinde tasymaldaý qyzmetin usynatyn «Astyq Trans» AQ-na (jekemenshik kompanııa) 4 750 vagon tıesili. Jyljymaly quramnyń bul mólsheri júk jóneltýshilerdiń qazirgi suranysyn tolyq kólemde qamtamasyz etýge qaýqarly. Osy oraıda «Astyq trans» kompanııasy elimizdiń ishki naryǵyndaǵy astyq tasymaldaý qyzmetin 98%-ǵa qamtyp kele jatqanyn atap ótken abzal.
Vagondardy tartyp, tazalaý úshin «QTJ» UK» AQ-nyń 130-ǵa jýyq manevrli lokomotıvi men jekemenshiktegi 767 lokomotıv jumyldyrylǵan. Atalǵan naryq tolyǵymen yryqtandyrylyp, básekelestik ortaǵa berilgenin aıta ketken oryndy.
Temirjol arqyly tasymaldaý tarıfterine toqtalsaq, shoıyn jolmen júkterdi jetkizýge baılanysty tarıf kelesideı tártippen qalyptasady. Atap aıtqanda, onyń quny magıstraldy temirjol jelisi (MJS) men lokomotıvti tartý (LT), sondaı-aq júk jáne kommersııalyq jumystyń (JK) qyzmetterine baılanysty.
Júk vagondaryn jaldap, paıdalaný qyzmetterin usyný naryǵynda tarıftik jáne tarıftik emes retteý quraldary qarastyrylmaǵanyn aıta ketý kerek. Ony básekelestik ortada naryq ózi retteıdi.