Prezıdent Qasym-Jomart Toqaev qazaqstandyqtardy Jańa jylmen quttyqtady, dep habarlaıdy Egemen.kz.
Mine, biz qazir bir el bolyp, Jańa jyldy qarsy alamyz. Ony bárimiz izgi nıetpen kútip otyrmyz. Osy sátte merekelik kóńil-kúımen bir-birimizge aq tilek aıtamyz. Bolashaqqa senimmen qarap, jospar quramyz. Mıllıondaǵan azamattarymyz sııaqty men jańa jyl jarylqasyn dep keleshekke úmitpen qaraımyn. О́tip bara jatqan jyl elimiz úshin ońaı bolǵan joq, kúrdeli boldy. Qańtar aıynda táýelsizdik tarıhyndaǵy zor syn-qaterge tap boldyq. Biraq halqymyzdyń myzǵymas birliginiń arqasynda biz osy qaterdiń betin qaıtardyq. Eldigimizdi saqtap qaldyq. Tól tarıhymyzǵa qarasaq, jurtymyz kóptegen syndardan shyńdalyp shyqqan. Biz de qıyndyqtardy artqa tastap, alǵa qaraı nyq qadam bastyq. Jalpy, osy jyl Qazaqstan úshin túbegeıli betburys jylyna aınaldy. Biz memlekettigimizdi nyǵaıtyp, jańarý jáne jańǵyrý jolyna tústik. Jalpyhalyqtyq referendým ótkizip, shyn máninde jańa Konstıtýsııamyzdy qabyldadyq. Onda naǵyz ádildik rýhy kórinis tapty. Endi Prezıdent 7 jyldyq merzimge bir ret qana saılanatyn boldy. Parlament júıesiniń reformasyn bastadyq. Halqymyz aýqymdy ózgeristerge qoldaý bildirdi. Saılaý júıesine jańa erejeler engizildi. Prezıdent saılaýy ashyq jáne ádil ótti. Munyń bári elimizdiń saıası júıesin jan-jaqty jańǵyrta tústi. Ákimshilik-aýmaqtyq reforma jasadyq. Abaı, Ulytaý jáne Jetisý oblystary quryldy. Ulttyq quryltaıdyń alǵashqy otyrysy ótti. Eń ózekti máselelerdi aýqymdy dıalog arqyly sheshetin boldyq. «Respýblıka kúnine» ulttyq mereke mártebesi berildi.
Bıyl elimiz úshin nesibeli jyl boldy. 400 myńǵa jýyq sábı dúnıege kelip, kóptegen otbasynyń shańyraǵy baqytqa toldy. Biz balalar jylynda «Ulttyq qor – balalarǵa» bastamasyn kóterdik. Bul – óskeleń urpaqtyń jarqyn bolashaǵy úshin jasalǵan óte mańyzdy qadam. Dıqandarymyz 23 mıllıon tonna astyq jınady. Bos jatqan 5 mıllıon gektar jer memleketke qaıtaryldy.Birneshe iri óndiris iske qosyldy. Myńdaǵan jańa jumys oryndary ashyldy. «Qazaqstan halqyna» qory quryldy, sonyń arqasynda kóptegen azamatqa naqty kómek kórsetilip jatyr. Sportshylarymyz álemdik jarystarda kók týymyzdy jelbiretti. Kúrdeli geosaıası jaǵdaıda Qazaqstannyń halyqaralyq bedelin arttyrdyq, birqatar alpaýyt elderdiń senimdi seriktesi atandyq. Osylaısha, Barys jyly aýqymdy ózgerister men jańa dáýirdiń bastaýy boldy. О́tip bara jatqan 2022 jyl tarıhta eńserý jyly retinde qalady. Elimiz alapat synaqqa tótep berdi. Qıyndyqpen betpe-bet kelgen qazaqstandyqtar jarqyn bolashaq úshin birige bildi. Biz shyńdala tústik.
Túbegeıli reformalardy jalǵastyrýymyzǵa eshbir syn-qater kedergi bola almady. Ádiletti Qazaqstandy qurý úshin berik negiz qalandy. Saıası ózgerister dáıekti túrde júzege asyrylyp jatyr. Konstıtýsııalyq referendým men Prezıdent saılaýy negizgi bılik ınstıtýttaryn jańǵyrtýǵa jol ashty.
Kelesi jyly Senat, Májilis jáne barlyq deńgeıdegi máslıhat depýtattarynyń saılaýy ótedi. Turǵyndar aýdan ákimderin de tikeleı saılaıdy. Bul qadam elimizde jańa demokratııalyq dástúrdi qalyptastyrýǵa, saıası mádenıetti arttyrýǵa jol ashatynyna senimdimin.
Adam quqyǵyn qorǵaý salasynda edáýir tabysqa jettik. Ekonomıkamyzdy monopolııadan aryltyp, onyń qurylymyn qaıta qurý úderisin bastadyq. Biz munymen shektelmeımiz.
Jańa jylda sapaly joldar, qoljetimdi turǵyn-úıler, zamanaýı mektepter men aýrýhanalar salamyz. Bılik kásipkerlikti damytýǵa qolaıly jaǵdaı jasaıdy. Inflıasııany aýyzdyqtap, halyqtyń naqty tabysyn arttyrý jáne óndiristi jolǵa qoıý Úkimettiń basty mindeti bolyp qala beredi. Men Prezıdent laýazymyna qaıta saılanǵannan keıin, eń aldymen, aýyldy kórkeıtýge, aýyldyq aýmaqtardy damytýǵa baǵyttalǵan keshendi jumystardy bastaý týraly Jarlyqqa qol qoıdym.
Biz ózi isine adal, Otanymyzdyń naǵyz patrıottary men kásibı mamandarǵa jan-jaqty qoldaý kórsetemiz. Kásiporyndarda eńbek etetin jumysshylar jáne sharýalar, ǵalymdar men mádenıet qaıratkerleri, áskerıler men quqyq qorǵaý júıesiniń qyzmetkerleri, ınjenerler men qurylysshylar, kásipkerler men sportshylar, mesenattar men volonterler, jýrnalıster men medıa salasynyń mamandary, sondaı-aq muǵalimder, tárbıeshiler, dárigerler, medısına jáne áleýmettik sala qyzmetkerleri – halqymyzdyń eren erleri. Biz kele jatqan Jańa jyldan zor úmit kútemiz. Barshańyzǵa málim, álemdegi ahýal asa kúrdeli. Soǵan qaramastan, kelesi jyl elimiz úshin jemisti jyl bolady dep senemiz. Aldymyzda aýqymdy jumys tur, kóptegen josparymyzdy júzege asyrýymyz kerek. Negizgi maqsat – memleketimizdi nyǵaıtý jáne halqymyzdyń ál-aýqatyn arttyrý. Men Prezıdent retinde osy maqsattarǵa jetý úshin barlyq kúsh-jigerimdi salamyn. Aldaǵy jyly ulttyń rýhyn kóteretin mańyzdy is-sharalar ótedi. Biz bir el bolyp, bir halyq bolyp, birlese eńbek etip, Jańa jylda jańa tabysqa jetemiz. Men buǵan kámil senemin. Bıylǵy qıyndyqtarǵa qaramastan, biz keleshekke úlken úmitpen qaraımyz. Aldaǵy 2023 jyl tyń múmkindikterge qol jetkizip, bıik belesterdi baǵyndyratyn jyl bolady dep senemin. Aldaǵy jolymyz ońaı bolmaıdy. Alaıda kúdik pen kúmánnen arylyp, kózdegen maqsatqa jetý úshin batyl qadam jasaý kerek. Sonda ǵana muratymyzǵa jetemiz.
«Jaqsylyq bar jerde tapshylyq bolmaıdy» deıdi halqymyz. Jańa jylda barshamyz jaqsylyqqa umtylaıyq. Bir-birimizge janashyr, qamqor bolaıyq. Eń bastysy, tabandy eńbek etip, elimizdi birge damytaıyq. Jańa jyl halqymyz úshin berekeli jyl bolsyn! Ár shańyraq shattyqqa, qýanyshqa tolsyn!Barshańyzǵa zor densaýlyq, mol tabys tileımin! Jańa jyl qutty bolsyn, aǵaıyn!