Almatynyń Naýryzbaı aýdanynda «Alan» sport kesheni ashyldy. Zamanaýı jabdyqtalǵan seksııalarda 500-den astam bala sportpen shuǵyldanady.
Keshenniń ashylýyna uıytqy bolǵan Almaty qalasy isker áıelder qaýymdastyǵynyń múshesi Shynar Búgimbaevanyń aıtýynsha, joba balalardyń salamatty ómir súrýine baǵyttalǵan. Búginde myńnan astam áıeldi, olardyń qatarynda kópbalaly analardy jumyspen qamtyp otyrǵan «Qaganat» jelisiniń jetekshisi, tórt balanyń anasy Shynar Búgimbaeva sońǵy jyldarda qarqyndy damyp kele jatqan Naýryzbaı aýdanynda salynǵan sport kesheninde balalar úshin sportpen aınalysýǵa tolyqqandy jaǵdaı jasalǵandyǵyn atap ótti.
Keshenniń ashylý saltanatyna «Qazaqstan barysy» týrnıriniń alǵashqy jeńimpazy Ulan Rysqul men dzıýdodan Azııa júldegeri Eldos Jumahanov qatysyp, jas sportshylarǵa sáttilik tiledi. Almaty qalasy Kásipkerler palatasynyń ókili Nııaz Jalǵasuly balalardyń alańsyz sportpen aınalysýy úshin mundaı nysandardyń asa qajet ekenin atap ótti. «Jańa nysandardyń boı kóterýi qalada jańa jumys oryndarynyń ashylýyna yqpal etedi. Sondyqtan belsendi kásipkerlerdi quptaı otyryp, árdaıym keńes berýge daıynbyz», dedi N.Jalǵasuly.
Eki myń sharshy metr aýmaqty alyp jatqan keshende úsh úlken, úsh shaǵyn zal, sonymen birge balalar tamaqtanatyn ashana bar.
ALMATY