Memleket basshysy Qasym-Jomart Toqaev Birikken Arab Ámirlikteriniń Prezıdenti sheıh Muhammed ben Zaıd Ál Nahaıanmen kelissóz júrgizdi, dep habarlaıdy Egemen.kz Aqordanyń resmı saıtyna silteme jasap.
Memleket basshysy qurmet kórsetkeni úshin sheıh Muhammed ben Zaıd Ál Nahaıanǵa alǵys aıtty. Sondaı-aq bıyl shetelge alǵashqy resmı sapary Birikken Arab Ámirlikterinen bastalyp otyrǵanyn atap ótip, eki eldiń yntymaqtastyǵyn nyǵaıtýda bul sapardyń mańyzy zor ekenine nazar aýdardy.
«Ámirlikter – ıslam jáne arab álemindegi bizdiń senimdi ári basty strategııalyq seriktesimiz. Sizdiń elińiz táýelsizdiktiń alǵashqy jyldarynan bastap Qazaqstanǵa qoldaý kórsetip keledi. Qazaq halqy muny eshqashan umytpaıdy. Ásirese, elordamyzdy kórkeıtýge Arab Ámirlikteri zor úles qosty. Bul – shynaıy dostyqtyń aıqyn kórinisi», dedi Memleket basshysy.
Qasym-Jomart Toqaev byltyr Qazaqstan men BAÁ arasynda dıplomatııalyq qatynas ornaǵanyna 30 jyl tolǵanyn eske saldy. Sonymen birge osy kezeńde túrli saladaǵy yntymaqtastyq nyǵaıa túskenin, eki el arasynda mazmundy ári ashyq saıası dıalog ornaǵanyn atap ótti.
«Eki eldiń qarym-qatynasynda túrli salada jetistikter az emes. Degenmen eki memleket arasyndaǵy yntymaqtastyqqa tyń serpin beretin kez keldi. Osy sátti paıdalanyp, Sizge zor alǵysymdy bildiremin», dedi Prezıdent.
О́z kezeginde Birikken Arab Ámirlikteriniń Prezıdenti sheıh Muhammed ben Zaıd Ál Nahaıan 1992 jyly dıplomatııalyq qarym-qatynas ornatylǵannan beri eki eldiń yntymaqtastyǵy joǵary deńgeıge kóterilgenine toqtalyp, Qazaqstanmen saıası jáne ekonomıkalyq baılanystar aıasyn keńeıtýge nıetti ekenin jetkizdi.
«Elderimizdiń energetıka, ǵarysh, tehnologııa, saýda salalaryndaǵy yntymaqtastyq áleýeti joǵary dep sanaımyz. Osy sapar barysynda jańartylatyn energııa salasynda mańyzdy qujattarǵa qol qoıyldy. Kelisilgen jobalardyń tolyqqandy júzege asatynyna zor úmit artamyn. Elderimizdiń aýaǵa taralatyn kómirtegi mólsherin azaıtý jónindegi josparlary da uqsas. Birikken Arab Ámirlikteri kómirtegi beıtaraptaǵyna 2050 jylǵa deıin jetýdi josparlasa, Qazaqstan bul maqsatty 2060 jylǵa deıin oryndaýdy kózdep otyr. Bul – bizdiń bolashaq urpaq úshin óte mańyzdy másele», dedi Birikken Arab Ámirlikteriniń Prezıdenti.
Kelissóz barysynda Qazaqstan men Birikken Arab Ámirlikteriniń arasynda saýda-ekonomıkalyq jáne ınvestısııalyq yntymaqtastyqty damytýdyń basym baǵyttary talqylandy. Atap aıtqanda, taraptar jańartylatyn energetıka, azyq-túlik qaýipsizdigi men aýyl sharýashylyǵy, taý-ken, kólik-logıstıka, qurylys-development jáne halyqaralyq qarjy ortalyqtary arasyndaǵy yntymaqtastyq syndy perspektıvaly salalar boıynsha ekijaqty yntymaqtastyqty nyǵaıtý jóninde ýaǵdalasty.
Ekijaqty yntymaqtastyqtyń basqa da basym baǵyttary Memleket basshysy Qasym-Jomart Toqaev pen Birikken Arab Ámirlikteriniń Prezıdenti sheıh Muhammed ben Zaıd Ál Nahaıannyń Birlesken málimdemesinde jarııalandy.
Resmı sapar aıasynda kelesi qujattarǵa qol qoıyldy:
1. Qazaqstan Respýblıkasynyń Úkimeti men Birikken Arab Ámirlikteriniń Úkimeti arasyndaǵy Strategııalyq ınvestısııalyq jobalardy qurý týraly birlesken deklarasııa;
2. Qazaqstan Respýblıkasynyń Indýstrııa jáne ınfraqurylymdyq damý mınıstrligi men Birikken Arab Ámirlikteriniń Bas azamattyq avıasııanyń basqarmasy arasyndaǵy ózara túsinistik týraly memorandým;
3. Qazaqstan Respýblıkasynyń Energetıka mınıstrligi, «KIDF» qory jáne «Masdar» kompanııasy arasyndaǵy Qaǵıdattar týraly kelisim;
4. «KIDF» qory men «Masdar» kompanııasy arasyndaǵy yntymaqtastyq týraly kelisim;
5. Qazaqstan Respýblıkasynyń Indýstrııa jáne ınfraqurylymdyq damý mınıstrligi jáne «Abu Dhabi Ports» kompanııasy arasyndaǵy ózara túsinistik týraly memorandým;
6. «QazMunaıGaz» UQ» AQ jáne «Abu Dhabi Ports Group» kompanııasy arasyndaǵy Strategııalyq áriptestik týraly kelisim;
7. Qazaqstan Respýblıkasynyń Densaýlyq saqtaý mınıstrligi men Birikken Arab Ámirlikteriniń Densaýlyq saqtaý jáne profılaktıka mınıstrligi arasyndaǵy Densaýlyq saqtaý salasyndaǵy yntymaqtastyq jónindegi ózara túsinistik týraly memorandým;
8. QR Prezıdenti janyndaǵy Memlekettik basqarý akademııasy men Anýar Gargash atyndaǵy Dıplomatııalyq akademııa arasyndaǵy ózara túsinistik týraly memorandým;
9. Qazaqstan Respýblıkasy Prezıdentiniń Arhıvi men Birikken Arab Ámirlikteriniń Ulttyq kitaphanasy men arhıvteri arasyndaǵy Arhıv isi salasyndaǵy halyqaralyq baılanystardy júzege asyrý jónindegi kelisim.