Qazaqstan Respýblıkasy Prezıdentiniń Ákimshiligi men qalalyq máslıhat depýtattarynyń kelisimi boıynsha Meıram Muratuly Qojýhov Qaraǵandy qalasynyń ákimi bolyp taǵaıyndaldy, dep habarlaıdy Egemen.kz.
О́ńir basshysy Ermaǵanbet Bólekpaev qalalyq máslıhattyń kezekten tys sessııasyna qatysyp, ákimdikke kandıdatty tanystyrdy. Depýtattar ony qoldady.
«Meıram Muratuly uzaq jyldar Qaraǵandyda qyzmet etti. Barlyq suraqtarmen tanys. Eń bastysy, ony qala turǵyndary jaqsy biledi. Jınaǵan tájirıbesi men bilimi onyń qalanyń áleýmettik-ekonomıkalyq damýy úshin áleýetin júzege asyrýǵa kómektesedi dep oılaımyn. Sizderdiń basymdyqtaryńyz qaraǵandylyqtar úshin qolaıly jaǵdaı jasaý bolýy tıis», dedi aımaq basshysy.
Ermaǵanbet Bólekpaev jańa ákimge ınfraqurylymdy odan ári damytý jáne jylý berý maýsymynyń kedergisiz ótýin qamtamasyz etý boıynsha mindetterdi tapsyrdy.
Meıram Qojýhov 1972 jyly dúnıege kelgen. 2001 jyldan bastap memlekettik qyzmette. Saran qalasynyń mádenıet, jastar saıasaty, sport jáne týrızm bóliminiń bas mamany boldy. Aqtas aýylynyń ákimi, Saran qalasy ákiminiń orynbasary, Qaraǵandy qalasy Oktıabr aýdanynyń ákimi qyzmetterin atqarǵan.
2022 jyldyń sáýirinen osy ýaqytqa deıin Qaraǵandy qalasy ákiminiń orynbasary qyzmetin atqardy.