QR Memlekettik qyzmet isteri agenttigi 2023 jyldyń 1 naýryzynan bastap memlekettik qyzmetke irikteýdiń jańa júıesin pılottyq rejımde synaqtan ótkizedi, dep habarlaıdy Egemen.kz.
«Pılottyq joba 1 naýryzdan bastap 5 memlekettik organda, atap aıtqanda Memlekettik qyzmet isteri agenttiginde, Indýstrııa jáne ınfraqurylymdyq damý mınıstrliginde, Saýda jáne ıntegrasııa mınıstrliginde, Aqmola oblysy men Shymkent qalasynyń ákimdikterinde ótedi», dedi agenttik tóraǵasy Darhan Jazyqbaev vedomstvonyń keńeıtilgen otyrysynda.
Onyń aıtýynsha, «E-qyzmet» portalynda memlekettik qyzmetke irikteýdiń jańa algorıtmi engizilgen. Konkýrstyq rásimniń jańa formaty úmitkerlerge kez kelgen ýaqytta jáne álemniń kez kelgen núktesinen qatysýǵa múmkindik beredi
- «E-qyzmet» júıesi barlyq negizgi aqparattyq júıelermen biriktirilgen. Úmitker týraly ózge aqparattyq júıelerden aqparat alý, onyń sottylyǵyn nemese ózge de quqyq buzýshylyqtarǵa qatystylyǵyn tekserý, biliktilik talaptaryna sáıkestigin qaraý – munyń bárin júıe avtomatty túrde ózi jasaıdy. Bizdiń maqsatymyz – irikteýdiń jańa júıesin pılottyq rejımde synaqtan ótkizý», - dep túsindirdi Darhan Jazyqbaev.