Túrkistan oblysynda talmasy ustap qalǵan 2 jasar balanyń ómirin saqtap qalǵan polıseı Erik Aqmoldaev marapattaldy, dep habarlaıdy Egemen.kz.
2 jasar balanyń ómirin saqtap qalǵan polıseı Erik Aqmoldaev – Túrkistan qalalyq polısııa basqarmasynyń patrýldik polısııa batalonynyń qyzmet ınspektory. Atalmysh erligimen kózge túsken polıseıdi oblystyq polısııa departamentiniń bastyǵy Murat Qabdenov qabyldady. Mindetin adal atqaryp, kishkentaı balanyń ómirine arasha bolǵan polıseı «Qazaqstan Polısııasyna 30 jyl» tósbelgisimen jáne alǵys hatpen marapattaldy.
«Bala – bizdiń bolashaǵymyz. Osy oraıda bizdiń árqaısymyz olardyń tynysh ómiri men tátti kúlkisi úshin bárin berýge daıynbyz. Al búginginiń batyry - Erik adam ómiri bárinen de mańyzdy ekenin is-áreketimen dáleldedi. Jedel sheshim qabyldap, ózgelerge úlgi bola bildi. Biz senimen maqtanamyz! Árqashan osylaı halyqtan alǵys alyp, abyroıyń asqaqtaı bersin», dep alǵysyn bildirdi M.Qabdenov.
Eske salsaq, bul jaıt Túrkistan qalasynda boldy. S.Erýbaev kóshesinde kúndelikti jumysyn atqaryp turǵan polıseıdiń janyna belgisiz áıel kelip, ulynyń aıaqasty aýyryp, talyp qalǵanyn aıtyp, kómektesýin suraǵan. Muny estigen polıseı shuǵyl áreket etip, balany aman alyp qaldy.