Elordanyń aýdandary men eldi mekenderiniń bárin sapaly baılanyspen jáne ınternet jelisimen qamtamasyz etý boıynsha belsendi jumys júrip jatyr. Bul týraly onlaın-brıfıngte Astana qalasy sıfrlandyrý jáne memlekettik qyzmetter basqarmasynyń basshysy Meırambek Áshirbekov aıtty, dep habarlaıdy Egemen.kz qala ákimdiginiń resmı saıtyna silteme jasap.
Elordada 16 eldi meken bar, olardyń beseýi, atap aıtqanda Temirjolshylar, Zarechnyı, Prıgorodnyı, Úrker, Kóktal-1 joǵary jyldamdyqty ınternetpen qamtamasyz etilgen. Taǵy 9 eldi mekende (Kóktal-1, Agroqalashyq, Internasıonalnyı, Ońtústik-Shyǵys, Promyshlennyı, Telman, Mıchýrıno, Qazqalashyq, Kırpıchnyı) optıkalyq baılanys jelileriniń qurylysy boıynsha jumys júrip jatyr, úsheýinde (Qoıandy, Kúıgenjar, О́ndiris) ınvestorlar tartylyp jatyr. Qalaǵa jumyldyrylǵan ınvestısııalardyń jalpy somasy 1,5 mlrd teńgeni quraıdy.
Máselen, Saryarqa aýdanynda «Kazahskıe domashnıe setı» JShS ınvestory Kóktal-1, 2, Agroqalashyq eldi mekenderiniń turǵyndary úshin ınternet jelisine qoljetimdilikti qamtamasyz etedi.
Kóktal-2-de 16 km kóshe kabeli tartyldy. Munda alǵashqy abonentter ótken jyldyń qarasha aıynda qosyldy. Kóktal-1-ge 7 km-den astam kabel tartyldy, abonentterdi qosý 2023 jyldyń naýryzyna deıin josparlanǵan.
«Kóktal-2 shaǵyn aýdanynyń alǵashqy abonentteri ınternetke qosyldy. Turǵyndarǵa talshyqty-optıkalyq baılanys jelileri arqyly joǵary jyldamdyqty ınternet jáne sandyq teledıdar qyzmetteri usynylady. Zamanaýı GPON tehnologııasy jaryqtandyrý baǵanalary men elektr jelileri arqyly ótedi. Barshyn, Qulanótpes, Saýmalkól, Aıdarly, Aqmola, Ulytaý jáne basqa da kóshelerdegi 200 úı qosylýǵa daıyn», dedi Meırambek Áshirbekov.
Esil aýdanynyń Úrker, Telman eldi mekenderinde bul jumysty Synergy Telecom JShS ınvestory júrgizedi. Máselen búginde Úrkerde 20 km kóshe kabeli tartyldy. 50 abonent qosyldy, 70 ótinim boıynsha jumys júrip jatyr.
- «Qazaqtelekom» AQ-men birlesip Úrker eldi mekeninde 290-nan astam úıdi qamtıtyn kóshelerde mıkrotútikshelerdi paıdalana otyryp jeliler salý boıynsha jumys júrgizildi. Bul Malaısary batyr, Taýkent, Er Tóstik, Mádı, Muryn Jyraý, Omba, Syrym batyr, Boıtumar, Jasybaı, Smaǵul Sádýaqasov kósheleri», - dedi spıker.
Sonymen qatar «Astana-AEK» AQ-men birlesip ınvestorlardy tolyq qarjylandyrý esebinen elordanyń eldi mekenderinde elektr berý jáne jaryqtandyrý tirekteri boıynsha optıkalyq baılanys jelilerin júrgizý máselesi pysyqtaldy.