BÁSEKELESTIK KILTI – BILIMDE

Elordanyń erteńi aldyndaǵy jaýapkershilik

«Bilekti birdi jyǵar, bilimdi myńdy jyǵar» degen halyq danalyǵynyń búgingi álemdik básekede bási myqty urpaq qalyptastyrýdyń basty qaǵıdasyna aınalǵandyǵy talassyz aqıqat. Elordanyń búgingi býyrqanǵan órkenıet básekesine qosylǵan osy 16 jyldyq shejiresinde qalalyq bilim berý salasynyń úlesine túsken ýaqyt syny, bolashaq jolyndaǵy jaýapkershilik júgi az emes. Elordanyń erteńi aldyndaǵy zor mindetti mejelegen osy salanyń sapaly bilim, sanaly tárbıe berý maqsatynda atqaryp jatqan jumysymen tanysý úshin Astana qalalyq bilim basqarmasynyń basshysy Elmıra Sýhanberdıevany áńgimege tarttyq. – Elmıra Amangeldiqyzy, salı­qaly suhbatymyzdy qalalyq bilim berý salasynyń jalpy jaǵdaıymen qysqasha tanysýdan bastasaq. – Elordadaǵy jalpy orta bilim beretin mekemelerdiń barlyǵy astanalyqtardyń suranysyna, búgingi kúnniń talaptaryna tolyq jaýap berý maqsatynda qyz­met atqarady. Táýelsizdigimizdiń tuǵy­ryna, eldigimizdiń aıbaryna aınalǵan Astana qalasy bilim berý júıesiniń órkenıet úrdisine saı bolýy – Memleket basshysynyń bizdiń aldymyzǵa qoıyp otyrǵan basty talaby. Bul rette Elbasy Nursultan Nazarbaev «Bizge ulttyq ıntellektiniń dińin qurý qajet, bizge halyqaralyq deńgeıde básekege túse alatyn erýdısııaly adamdar kerek», dep atap kórsetken bolatyn. Osydan-aq bolashaqtaǵy básekelestik kilti – bilimde jatqany aıqyn ańǵarylady. Bizdiń jumysymyzdyń basty baǵdary da osy talap bıiginen kóriný bolyp tabylady. Astana qalasynda búgingi tańda 84 jalpy bilim beretin mektepter jumys isteıdi. Onyń ishinde 72 memlekettik jáne 12 jekemenshik bilim uıasy bar. Bul bilim berý oshaqtarynda 94 712 oqýshy bi­lim nárimen sýsyndaýda. Mektepke deıin­gi bilim berý mekemelerine keletin bol­saq, olardyń sany – 148. Bul mektepke deıingi bilim berý nysandarynyń 80-i mem­lekettik, 66-sy jekemenshik, 2-ýi vedom­stvolyq mekemeler bolyp tabylady. – Elbasy óziniń Joldaýynda «Ulttyq bilim berýdiń barlyq býyny­nyń sapasyn jaqsartýda bizdi aýqymdy jumystar kútip tur», dep atap kórsetti. Osyǵan baılanysty Astana mektepterindegi bilim sapasynyń dárejesi jáne muǵalimderdiń kási­bı deńgeıi týraly ne aıtasyz?  – Joǵaryda atap ótkenimizdeı, sapaly bilim búgingi jahandaný dáýirindegi básekelestiktiń tuǵyryna aınalyp otyr. Memleketimiz bilim deńgeıiniń órke­­nıet talaptaryna saı bolýy úshin bar­lyq qajetti múmkindikterdi jasap kele­di. Elbasynyń syndarly saıasatynyń arqa­synda elimizdiń bilim salasy jyldan-jyl­ǵa damýda. Bul úrdiste elordalyq bi­lim salasy kósh basynan kórinip júr desek, artyq aıtqandyq emes. Máselen, ót­ken 2013-2014 oqý jyly Astananyń 393 oqý­shysy AQSh, Ázerbaıjan, Brazılııa, Grý­zııa, Reseı, Túrkııa, Kıpr jáne Úndi­stan­da ótken halyqaralyq olımpıadalar men ǵylymı baıqaýlarǵa qatysyp, 237 medal jeńip aldy. Onyń ishinde 64 al­tyn, 76 kúmis jáne 97 qola medal ıe­len­di. Bıylǵy jylǵy respýblıkalyq ǵy­ly­mı jobalar baıqaýynda elordanyń oqý­shylar komandasy taǵy da jeńimpaz ata­nyp, «Eń úzdik komanda» ataǵyn taǵy qýattady. Daryndy balalardy anyqtaý jáne olarǵa qoldaý kórsetýdiń basty baǵyttary – barlyq deńgeıdegi jalpy bilim berý pánderi boıynsha ótkiziletin olımpıadalar bolyp tabylady. Qalalyq oqýshylar komandasy osyndaı respýblıkalyq olımpıadalarda 2014 jyly qatarynan 69 ret júldeli oryndardy ıelendi. Sońǵy 3 jylda astanalyq oqýshylar komandasy turaqty túrde «Eń úzdik olımpıadalyq komanda» ataǵyn ıelenip keledi. «Bala janynyń baǵbany» ustazdar qaýymyna júkteletin mindet pen zamanaýı talap ta kúnnen-kúnge artyp otyr. Qazirgi zamanǵy pedagog – bul syn turǵysynan oılaıtyn, teorııalyq bilimi tereń, oqytýdyń qazirgi zamanǵy ádisterin jetik biletin, sandyq tehnologııalar men ınternet-resýrstardy erkin meńgergen jańa qoǵamnyń ustazy. Ustazdyq sheberligin jetildirý maqsatynda astanalyq pedagogtar únemi shyǵarmashylyq izdeniste. Qazir Astana qalasynyń bilim berý júıesinde 11 856 pedagog qyzmetkerler jumys is­teı­di. Olardyń ishinde 9 996 (84,3 paıyz) muǵalimniń joǵary bilimi bolsa, 8 188 muǵalimniń (69 paıyz) joǵary biliktilik sanaty bar. Al, jalpy bilim beretin mektepterde jumys isteıtin 5 873 ustazdyń 5 316-sy joǵary bilimdi (91 paıyz) mamandar bolyp tabylady. Aǵymdaǵy jyldyń birinshi jarty jylynda qalamyzda 458 ustaz óz biliktiligin arttyrdy. – Elimizde UBT tártibiniń engizil­genine biraz jyl boldy. О́kinishke qaraı, osy máselede áli de sheshilmegen prob­lemalar barshylyq. Qalamyzda bıyl UBT qalaı ótkizildi? – Ulttyq biryńǵaı testileý balalardyń bilim deńgeıin anyqtaý synaǵy ǵana emes, sonymen birge, mektepterdiń bilim berý sapasy dárejesiniń kórsetkishi ekeni de belgili. Sońǵy jyldary júıeli ótkizilip kele jatqan osy dástúrli bilim berý baıqaýynda astanalyq mektep bitirýshilerdiń ortasha ball kórsetkishi artyp keledi. Oǵan dálel bıylǵy testileýge qatysqan mektep bitirýshilerdiń ortasha baly – 87,58 boldy. О́tken jyly ortasha ball – 81,3-ti quraǵan bolatyn. Aǵymdaǵy jyly qala boıynsha 4042 oqýshy mektep bitirse, olardyń ishinde 3252 oqýshy UBT-ǵa, 790 oqýshy dástúrli emtıhanǵa qatysty. Qala mektepterin bitirýshilerdiń ishindegi 132 «Altyn belgi» úmitkerleriniń ishinde UBT-dan keıin 91 oqýshy «Altyn belgilerin» rastady. 9 oqýshyǵa 1 baldan ǵana jetpeı qalǵan. Qaladaǵy UBT boıynsha eń joǵary ball – 124 ball boldy. Osy joǵary baldy №54 mektep-lıseıdiń oqýshysy Aıajan Sátenova, №48 mektep- lıseıdi bitirýshi Nazgúl Esen men Ǵaını Másimhan ıelendi. UBT-ǵa daıyndyq máselesi Bilim basqarmasynyń bilim berý uıymdary basshylarynyń qatysýymen ótken alqa májilisi men keńesinde, qala ákiminiń orynbasary men Astana qalasy ákimdiginiń qurylymdyq bólimsheleri bastyqtarynyń qatysýymen bolǵan keńeste qaraldy. Bilim berý uıymdarynda ata-analar jáne mektep túlekterimen aqparattyq-túsin­dirý jáne psıhologııalyq daıyndyq ju­mystary júrgizilip, aı saıyn synaq testi­leý alynyp, nátıjesi taldanyp otyrdy. Oqýshylardy UBT-ny ótkizý ornyna jetkizý bilim berý uıymdarynyń quzyrynda. Oqýshylardyń ómir qaýipsizdigi úshin jaýapkershilik qala mektepteriniń basshylaryna júkteldi. UBT-ny ótkizý oryndarynda qoǵamdyq tártipti saqtaý, medısınalyq qyzmet kórsetý jumysy uıymdastyryldy, sondaı-aq, ǵımarattyń órtke qarsy qaýipsizdik sharalarynyń saqtalýy, elektroenergııanyń qajetti qýatymen qamtamasyz etýi tekserildi. UBT О́O aýdıtorııalardy uıaly baılanysty sóndiretin qurylǵylar, metall izdeýishtermen qamtamasyz etildi. UBT ótkizý barysynda eshqandaı balanyń quqyǵyn buzý máselesi oryn alǵan joq. – Qala halqynyń kúrt ósýine baılanysty mektep oqýshylarynyń sany jyl saıyn artyp keledi. Úsh aýysymmen dáris beretin mektepter de bar. Osyǵan oraı Astanadaǵy mektep bazalarynyń múmkindigi jáne perspektıvalary týraly ne aıtasyz? – Oqýshylar sany jyl saıyn artyp keledi, onyń basty sebebi demografııalyq ósý jáne kóshi-qon úrdisiniń tolastamaýy. Otandastarymyzdyń óziniń ómiri men qyzmetin, balalarynyń bolashaǵyn Astana qalasymen baılanystyrǵysy keletini jasyryn emes. Osy maqsatta bıylǵy oqý jyly mektepterge elimizdiń basqa óńirlerinen 5027 bala oqýǵa kelse, tek 1-synypqa 12893 bala qabyldandy. Úsh aýysymdy mektepterdegi másele­ni sheshý, oqýshyǵa arnalǵan oryn tapshylyǵyn joıý úshin jyl saıyn mektepter salynýda. Bıylǵy oqý jyly 8 mektep salynbaqshy. Memleket basshysynyń elordada úsh aýysymmen oqytýdy joıý týraly tapsyrmasyn oryndaý úshin 2014 jyly 8 mektep, 2015 jyly 10 mektep, 2016 jyly 6 mektep salý jos­parlandy. 2014 jylǵy 1 qańtardaǵy málimet boıynsha, qalada úsh aýysymmen oqytatyn 5 mektep bar, olar: №8, 37, 57, 59, 65-shi mektepter. №57 orta mekteptiń, №65 mektep-gımnazııanyń jáne №59 mektep-lıseıdiń janynan jańa mektep ǵımarattaryn salý arqyly úsh aýysym máselesi sheshilmekshi, № 37 orta mektepke japsarjaı salý arqyly, al № 8 orta mekteptiń bastaýysh synyptaryn №16 orta mektepte salynatyn japsarjaıǵa aýystyrý arqyly úsh aýysymda oqytý máselesin 2016 jyly tolyǵymen sheshý josparlandy. – Elordada mektepke deıingi balalar mekemelerindegi oryn tapshylyǵy ótkir bolyp otyrǵandyǵy belgili. Osyǵan baılanysty «Balapan» baǵdarlamasy sheńberinde atqarylyp jatqan jumystar qandaı? Jalpy, bul keleli másele qashan tolyq sheshimin tabady? – Balalardy mektepke deıingi tárbıemen tolyq qamtamasyz etý úshin 2010 -2014 jyldar aralyǵynda «Balapan» baǵdarlamasy júzege asyrylýda. Astana qalasy boıynsha «Balapan» baǵdarlamasy mektepke deıingi júıeni damytý men qoldaý qajettiligine súıenip otyr. Qazirgi tańda Astana qalasy boıynsha barlyǵy 173 mektepke deıingi tárbıe mekemesi jumys isteıdi. Atap aıtatyn bolsaq 80 memlekettik balabaqshada 21 216 bala, 66 jekemenshik balabaqshada 6205 bala, 2 vedomstvolyq balabaqshada 360 bala, 25 shaǵyn-ortalyqta 3 688 bala jáne 66 mekteptegi mektepke deıingi synyptarda 1695 bala mektepke deıingi tárbıe máselesimen qamtylǵan. «Balapan» baǵdarlamasyn iske asyrý barysynda mektepke deıingi tárbıemen astanalyq búldirshinderdi keńinen qamtý máselesi jyldan-jylǵa jaqsarýda, biraq oryn tapshylyǵy áli de saqtalýda. Astana qalasynyń ákimdigi men Bilim jáne ǵylym mınıstrligi birlese otyryp bekitken 2014-2020 jyldar aralyǵynda elordada mektep jasyna deıingi mekemelerdegi oryn tapshylyǵyn sheshý jónindegi josparǵa sáıkes 2020 jylǵa deıin 107 443 búldirshinge ar­nalǵan 521 mektepke deıingi mekeme ǵı­maraty ashylmaq. Onyń ishinde res­pýblıkalyq bıýdjet esebinen 35 240 búl­dirshinge arnalǵan 86 balabaqsha ǵı­maraty salynbaq. – Qazir qalamyzdyń shet aımaq­tarynda, ásirese, burynǵy saıa­jaılarda turatyn otbasylardyń balalarynyń mektepke qatynaý jaǵdaıy óte kúrdeli. Osy rette shet aımaqtarda turatyn otbasylardyń bala­laryn bilim berý jáne tárbıe máse­le­lerimen qamtý jaǵdaıy qalaı? – Qalanyń shet aımaqtarynda jáne saıajaılarda turatyn otbasylardyń balalary dáris alatyn 9 mektepte oqýshylardy tasymaldaý úshin 19 avtobýs uıymdastyrylǵan. Avtobýstar 2 aýysymda qatynaıdy. Balalardyń mektepke kelý jáne mektepten úıge qaıtý baǵyttary belgilengen, avtobýstar osy aıaldamalar boıynsha júredi. Barlyq qarajat jolaý­shylar kóligi jáne avtomobıl joldary basqarmasy tarapynan bólinedi. Shet aımaqtarda negizinen jaǵdaıy tómen otbasylar turatyndyqtan, muǵalim­der oqýshylardyń múmkindikterine túsinistikpen qarap, tıisti qamqorlyqqa alǵan. Balalarǵa bilim berý jáne tárbıe máselelerin tereńdetý maqsatynda elordamyzda 12 memlekettik qosymsha bilim berý uıymdary bar. Sonymen birge elordalyq 68 mektepte (1-4-synyp balalary úshin) mektep janyndaǵy lagerler ashyldy. Jaz mezgilinde bul demalys oryndarynda 30 000 bastaý­ysh synyp oqýshylary tynyǵady. Mektep janyndaǵy lagerlerdiń negizgi maqsaty mektep jasyndaǵy balalardyń shyǵarmashylyq áleýetin damytyp, densaýlyǵyn nyǵaıtý, saýyqtyrý, olardyń boıynda salamatty ómir saltyn qalyptastyrý bolyp tabylady. – Elmıra Amangeldiqyzy, siz elimizdiń bilim berý salasynyń tájirıbeli de bilikti mamandarynyń birisiz. Osy baı tájirıbeńizge baılanysty qalalyq bilim salasynyń bolashaqtaǵy damý jaǵdaıy týraly oı bólisseńiz. – Elordalyq mektepterde bilim berýdegi qalyptasqan jaqsy dástúrdi jalǵastyra otyryp, sapaly bilim, sanaly tárbıeni órkenıet talaptarynyń joǵary deńgeıine kóterýdi kózdeımin. Bul rette astanalyq mektepterde estetıkalyq-matematıkalyq bilim berýdi tereńdete oqytýǵa betburys jasalýy kerek. Elor­dalyq bilim júıesi búgingi jahandaný talaptary kún tártibine qoıylǵan báse­kelestikke barynsha qabiletti bolýy qajet dep oılaımyn. Qalalyq bilim berý salasynyń qyzmetkerleri ózderine júktelgen jaýapkershilikti jaqsy túsinedi jáne senimnen shyǵýǵa bar sheberligimiz ben biliktiligimizdi jumsaıtyn bolamyz. – Salıqaly suhbatyńyzǵa rahmet. Áńgimelesken Jylqybaı JAǴYPARULY, «Egemen Qazaqstan».

Oqý-tárbıe úderisinde talap tereń

Táýelsiz elimizdiń elordasy jyldan-jylǵa órkendep, qanatyn keńinen jaıyp keledi. Qalanyń áleýmettik-ekonomıkalyq áleýeti artyp, halqynyń sany ósken saıyn astanalyq mektepterdiń de aýqymy keńeıip, atqarar jumysynyń salmaǵy óse túsýde. Sonaý bir kezeńde  oblys ortalyǵy bolǵan Selınograd qalasynda 37 mektep bolsa, búginde elordada 74 orta mektep óskeleń urpaqty bilim nárimen sýsyndatýda. Olardyń qatarynda bizdiń №70 mektep-lıseı de óziniń laıyqty ornyn alý jolynda jas urpaqqa sapaly bilim, sanaly tárbıe berý úrdisine qosylǵan. Arqa tósinde aıbynyn asqaqtatqan arý Astananyń órkendeýi úshin Memleket basshysy Nursultan Nazarbaevtyń sińirip kele jatqan eren eńbegi barshaǵa aıan. Osydan eki jyl buryn paıdalanýǵa berilgen №70 mektep-lıseıdiń búgingi ýaqyt talabyna saı salynǵan zamanaýı ǵımaratyn Elbasynyń ózi ashyp, bilim teńizindegi aq jelkenine sáttilik tilegen edi. 1200 oqýshyǵa arnalǵan bul mektep ǵımaratynda óskeleń suranysqa saı jabdyqtalǵan 52 oqý kabıneti jumys isteıdi. Onyń ishinde 2 mýltımedııalyq, ınternet júıesine qosylǵan 26 ınteraktıvti taqta ornatylǵan kabınet bar. Qalamyzdaǵy Oqýshylar saraıyna qarama-qarsy ornalasqan bizdiń mektep ǵımaratynyń kórkem kelbeti bas qalamyzdyń ozyq sáýletimen úndesip tur. Mektebimizdiń syrtqy sáýleti qandaı ásem bolsa, ishki mazmuny soǵan saı. Mektepte 360 oryndyq akt zaly, 408 oryndyq ashana jumys isteıdi. Balalardyń dene tárbıesin shyńdaýǵa baǵyttalǵan gımnastıka zaly, sport zaly bar. Mektebimizde oqý úrdisi memlekettik jalpyǵa mindetti bilim berý standartyna sáıkes júrgiziledi. Negizinen bizdiń oqý oshaǵynda – jaratylystaný-matematıkalyq pán­der tereńdetilip oqytylady. Bastaýysh synyptardaǵy oqýshylardyń shetel tilin meńgerýine baǵyttaý maqsatynda aǵylshyn tilinde aýyzsha sóıleý daǵdysyn qalyptastyrý úshin «Speaking English» 1 synyptarda 1 saǵattan (standart boıynsha taǵy 1 saǵaty bar), al 2-4 synyptarda 2 saǵattan; oqýshylardyń logıkalyq oı-óristerin keńeıtý maqsatynda 1-4 synyptarǵa 1 saǵattan «Logıka» kýrsy engizildi. Kúshaı Terbikbaıdyń avtorlyq baǵdarlamasy «Olımpıadalyq matematıka jáne oılaýdy damytý» 1-4 synyptarǵa engizildi. 2013-2014 oqý jylynda mektebimizde 1-11 synyp aralyǵynda 1527 oqýshy dáris aldy. Sonymen birge, mektepke qabyldanar búldirshinderdi ázirleıtin daıarlyq tobynda 29 oqýshyǵa bilim berý dástúrge aınalǵan. Jańa oqý jylynda 1 synypqa qabyldanǵan oqýshylardyń oqý mashaqatyn qalyptastyrý jáne qabiletterine saı qosymsha bilim alýyna jaǵdaı jasaý maqsatynda uzartylǵan kún toby uıymdastyrylady. Mektep-lıseıde oqıtyn oqýshylardyń 70 paıyzy bilim oshaǵynyń qabyrǵasynda jumys isteıtin ártúrli úıirmelerdiń jumysymen qamtylǵan. Bul rette bı óneri, dombyra, qolóner, «English theatre» atty aǵylshyn tilindegi teatr úıirmeleriniń mazmundy jumystaryn erekshe atap ótýge bolady. Sonymen birge, mektep janynda fýtbol, basketbol, voleıbol, karate sport úıirmeleri jastardyń bos ýaqyttaryn mazmundy ótkizip, dene tárbıesin shyńdaýǵa múmkindik beredi. Oqý oshaǵyndaǵy bilim sapasy ustazdardyń kásibı biliktilik dárejesine tikeleı baılanysty. Mektep-lıseıde biliktilik sanaty joǵary 30 muǵalim (onyń ishinde pedagogıka ǵylymdarynyń doktory – 2, kandıdaty – 1), 1-shi sanatty 21 muǵalim, 2-shi sanatty 24 ustaz eńbek etedi. Oqý-tárbıe úrdisinde bilim berýdiń 7 modýldik tehnologııasymen 22 muǵalim, N.Orazahynovtyń «Satylaı keshendi taldaý» tehnologııasymen 5 muǵalim, STO 25 muǵalim, deńgeılep saralaı oqytý tehnologııasymen 12 muǵalim, Vassermannyń «Bıoaqparattyq» jáne «Sınergetıkalyq» tehnologııasy boıynsha 3 muǵalim oqýshylarǵa dáris beredi. Mine, osyndaı joǵary deńgeıli bilim berý sapasynyń arqasynda oqýshylarymyz ártúrli baıqaýlarda jetistikterge jetip keledi. Qazirgi kúni mektep-lıseıde jańa oqý jylyna daıyndyq máselesi joǵary deńgeıde júzege asyrylýda. Muǵalimderimiz biliktiligin shyńdap, oqý kabınetterin aldaǵy bilim merekesine saqadaı saı etý maqsatynda ýaqytpen sanaspaı eńbek etýde. Maral QAZIEVA, №70 mektep-lıseıdiń dırektory.

«Aq qaıyńnyń» aıdyny aıqyn

Elordamyzdaǵy mektepke deıingi bilim berý mekemeleriniń arasynda №29 «Aq qaıyń» balalar baqshasynyń alar orny erekshe. Atalmysh balalar baqshasynyń shejiresi óte erteden bastaý alady. Búldirshinderge tárbıe berý salasynda bul mekeme 1964 jyldan beri jumys istep kele jatyr. Osy jyldar ishinde «Aq qaıyń» balalar baqshasynan qanshama búldirshin tárbıe alyp, úlken ómir jolynda óz soqpaqtaryn saldy deseńizshi. Taǵy bir erekshe atap ótetin másele, «Aq qaıyń» balalar baqshasynyń qalamyzdaǵy qazaq tilin damytý máselesine qosyp kele jatqan asa zor úlesi ekendigi daýsyz. 1989 jyldan beri bul mektep jasyna deıingi tárbıe beretin mekeme «qazaq balabaqshasy» mártebesine ıe bolyp, elordadaǵy eń úzdik balabaqsha qataryna qosyldy. Búginde balabaqshada 144 búldirshin tárbıelenedi. Olar negizgi 5 top boıynsha tárbıe sharalarymen qamtylǵan. Atap aıtqanda, «Balapan» I kishkentaılar toby (2-3 jasqa deıin), «Merýert» II kishkentaılar toby (3-4 jasqa deıin), «Injý» ortańǵy toby (4-5 jasqa deıin), «Kúnshýaq» eresekter toby (5-6 jasqa deıin) jumys isteıdi. Búldirshinderdi oqytý men tárbıeleý egemen elimizdiń jalpyǵa mindetti memlekettik bilim berý standarttaryna saı júzege asyrylady. Bizde «Alǵashqy qadam», «Zerek bala», «Biz mektepke baramyz», «Balbóbek» respýblıkalyq baǵdarlamalary, «О́zin ózi taný» rýhanı adamgershilik baǵdarlamasy, 5-6 jastaǵy balalarmen mektepaldy daıyndyq baǵdarlamasy boıynsha jumys júrgizi­ledi. 2013-2014 oqý jylynda otbasy men balabaqsha yntymaqtastyǵyn nyǵaıtý maqsatyndaǵy kóptegen mádenı jáne tárbıelik is-sharalar ótkizildi. Máselen, 2013 jyly «Kúz sıqyry» festıvali ótkizilip, búldirshinder óz ónerlerin sarapqa saldy. Bıylǵy jyly «Aq qaıyń» balalar baqshasynyń «Qyzǵaldaq» tobynyń tárbıelenýshileri Dılara Nurmaǵambetova tennısten 6-8 jastaǵy balalar arasynda ótken «Qyzyl dop» týrnırinde Astana qalasy Tennıs federasııasynyń II dárejeli dıplomyna, Narıman Isenov karate- shınkıokýshınkaıdan Halyq­aralyq ashyq chempıonatta 6 jasqa deıingi balalar arasynda II júldeli oryndy jeńip aldy. Qazirgi kúnde bizdiń balabaqshada óz isiniń naǵyz sheberleri atanǵan tájirıbeli pedagogtar jumys isteıdi. Tár­bıeshiler óz jumystarynda ın­no­va­sııalyq tehnologııalardy keńi­nen paıdalana otyryp, árbir búldir­shin­niń jan-jaqty jetilýine, mektep­ke deıingi jastaǵy balalardyń shy­ǵar­ma­shylyq belsendiligin damy­týda jumystar atqarady. Bul ret­te «Qyzǵaldaq» tobynyń jo­ǵa­ry sanatty tárbıeshisi Aınash Saǵa­naıdyń, «Kúnshýaq» tobynyń I sa­nat­ty tárbıe­shisi Jadyra Sádýa­qas­tyń bilikti de ná­tı­jeli eńbekterin erekshe atap ótken jón. Láıla Rahymjanova, №29 «Aq qaıyń» balalar baqshasynyń meńgerýshisi.

Betti ázirlegen Jylqybaı JAǴYPARULY,  sýretterdi túsirgen Erlan OMAROV.