Jáńgir han atyndaǵy Batys Qazaqstan Agrarlyq-tehnıkalyq ýnıversıtetiniń professory, tehnıka ǵylymdarynyń doktory Sársenbek Montaev «Álemdegi eń bedeldi ǵalymdardyń 2%» (World’s Top 2% Scientists) reıtıngine endi, dep habarlaıdy Egemen.kz Aýyl sharýashylyǵy mınıstrliginiń baspasóz qyzmetine silteme jasap.
Elsevier ǵylymı baspasynyń sońǵy málimetterine sáıkes, álemniń eń úzdik ǵalymdaryn Stenford ýnıversıtetiniń sarapshylary anyqtaǵan.
Sársenbek Montaev keıingi jyldary BQATÝ-da jumys istep júr. Qazir ýnıversıtettiń Indýstrıaldy-tehnologııalyq ınstıtýtyn basqarady. Qurylys materıaldaryn óndirýde jańa tehnologııalardy ázirleýshi, sondaı-aq aýyl sharýashylyǵy maqsatyndaǵy jerlerdiń topyraǵynyń qurylymdyq-mehanıkalyq qasıetterin jaqsartý jónindegi jobaǵa basshylyq etedi.
Professor «Bolashaq» baǵdarlamasy aıasynda Japonııada «Nanotehnologııa» mamandyǵy boıynsha ǵylymı taǵylymdamadan ótken.