Ekibastuzda turǵyndardyń aýrý túrlerin erte bastan anyqtaıtyn skrınıngtik zertteýler júrgizetin, sáýlelik, zerthanalyq, jalpy klınıkalyq, fýksıonaldyq jáne endoskopııa boıynsha dıagnostıkalyq qyzmetter kórsete alatyn №2 emhana ashyldy. Oblystyq densaýlyq saqtaý basqarmasynyń basshysy Nurlan Qasymovtyń aıtýynsha, elimizde qabyldanǵan «Salamatty Qazaqstan» baǵdarlamasynyń aıasynda halyqtyń densaýlyǵyn saqtaýda, emdelýshilerge sapaly medısınalyq kómek kórsetý, salamatty ómir saltyn júrgizý sııaqty naqty mindetter belgilengen. Kenshiler qalasynda ashylǵan jańa emhana 15 maýsym dárigerler kúni merekesi qarsańynda jaqsy syılyq boldy. Emdelýshiler de qýanyshty. Zamanaýı medısınalyq qural-jabdyqtarmen jabdyqtalǵan jańa emhana kúnine 500 adamdy qabyldaı alady. Jalpy, qalanyń 50 myńdaı turǵynyna qyzmet kórsetedi. Barlyq jaǵdaı jasalǵan. Birinshi qabatta múgedekterge arnalǵan jeke bólmeler jáne otbasy densaýlyǵy ortalyǵy ornalasqan. Ortalyqta pedıatrlar, terapevt dárigerler qabyldaý júrgizedi. Sondaı-aq, 40 orynǵa arnalǵan kúndizgi stasıonar júıesin qurý qarastyrylýda. Bıyl 18 jas maman dáriger kelipti. Emhanada 67 joǵary bilimdi dárigerler, 200-ge jýyq medbıke, orta medısına qyzmetkerleri eńbek etýde. О́tken jyly qalalyq ákimdik 49 jas dárigerge páter kiltterin tabys etken bolatyn. Qala ákimi Aleksandr Verbnıak emhana qurylysyn salýǵa respýblıkalyq bıýdjetten 1 mlrd. 670 mıllıon teńge bólingenin, kenshiler qalasy taǵy bir jańa emhanamen tolyqqanyn aıtyp ótti.
Farıda BYQAI,
«Egemen Qazaqstan.
EKIBASTUZ.