Ortalyq kommýnıkasııalar qyzmeti ortalyǵynyń Almaty bólimshesinde Bilim jáne ǵylym mınıstri Aslan Sárinjipov bıylǵy Ulttyq biryńǵaı testileý kórsetkishteri boıynsha jýrnalısterge brıfıng ótkizdi.
Elimizdiń ózge aımaqtarymen tikeleı baılanys túrinde júrgizilgen brıfıngke mınıstrden ózge Bilim jáne ǵylym mınıstrligi Bilim jáne ǵylym salasyn baqylaý komıtetiniń tóraǵasy Zábıra Orazalıeva men Ulttyq testileý ortalyǵynyń dırektory Qalı Ábdıevter qatysty.
Mınıstrdiń aıtýynsha, 2014 jylǵy UBT-ǵa 87 myń, ıaǵnı 65 paıyz bitirýshi qatysyp, olardyń 13 myńnan astamy 100 baldan joǵary jınaǵan. 2013 jylmen salystyrǵanda bul 3 paıyzǵa joǵary. Eń joǵarǵy kórsetkish – 125 baldyq deńgeıdi elimiz boıynsha 4 oqýshy erkin baǵyndyrǵan. Sondaı-aq, apellıasııaǵa 400-den asa suraý salynyp, olardyń 84-i 14 maýsymǵa deıin tolyqtaı qanaǵattandyrylǵan. Budan ózge 50 baldyq deńgeıden óte almaǵan bitirýshilerdiń jalpy sany 20 myń, ıaǵnı 23 paıyz. Byltyr bul kórsetkish 28 paıyz bolǵan.
Mınıstr keltirgen derek boıynsha, UBT-ǵa qatysý men eń joǵarǵy kórsetkishterge qol jetkizýde aldyńǵy orynda Almaty qalasy, ekinshi orynda Astana, odan keıin Aqtóbe qalasy men Batys Qazaqstan oblysy tur eken. Muny A.Sárinjipov Almaty, Astana sekildi qalalarda bilim berý deńgeıiniń ósýi men joǵary sanatty muǵalimder qatarynyń artýymen, sondaı-aq iri qalalarda izdenimpaz jastarǵa tolyqtaı jaǵdaıdyń jasalýymen jáne múmkinshilikterdiń kóptigimen túsindirdi.
Byltyr qalalyq jerde ortasha bilim deńgeıi 79 baldy kórsetse, bıyl 81,5 ball. Al aýdandyq jerlerde 70,3 ball bolsa, bıyl 72,19 baldy kórsetip otyr. Qala men aýdandar arasyndaǵy 10 baldyń ájeptáýir aıyrmashylyq ekenin aıtqan mınıstr keleshekte bul kórsetkishtiń ósýimen qatar deńgeılesýine de úlken mán beriletindigin jetkizdi.
Sońǵy 2-3 jyl kóleminde bitirýshilerdiń bıologııa men fızıka pánine qyzyǵýshylyqtary artqany belgili boldy. Bul degenimiz elimizdiń jastary tehnıkalyq salaǵa mán berip, kúrdeli ǵylymǵa umtylyp jatqanyn aıǵaqtaıdy.
2014 jylǵy UBT qorytyndysy elimizdiń mektep bitirýshileri arasynda «Altyn belgige» laıyqtylar sapasynyń artqanyn da kórsetti. Bul belgige laıyq dep usynylǵan bitirýshilerdiń bıyl 42 paıyzy óz bilimimen «Altyn belgi» ıegeri atansa, byltyr 34 paıyzy ǵana osy belgige laıyq bolǵan-dy. Eger sapadan sanǵa kósher bolsaq, bıylǵy kórsetkish boıynsha paıyzdyq deńgeı az bolǵanymen, «Altyn belgini» qorǵaýshylar sany joǵary deńgeıdi kórsetti.
Bilim jáne ǵylym mınıstri UBT boıynsha eń joǵary ball jınaǵan mektepterdiń tizimin de atap ótti. Olardyń arasynda Astana, Oral, Ońtústik Qazaqstan oblysy, Almaty qalasy, Qostanaı men Kentaý qalalaryndaǵy bilim ordalary bar.
Jıynda, bıylǵy UBT-ǵa qatysýshy túlekterdiń jalpy sany eldegi demografııalyq kórsetkishtermen tikeleı baılanysty ekendigi aıtyldy. 2014 jyly 133 myń oqýshy mektep bitirse, byltyr 139 myń túlek bitirgen, ıaǵnı, bıyl bizde mektep bitirýshiler sany 6 myń balaǵa azaıyp otyr. Jáne bul kórsetkish aldaǵy 3-5 jyl boıyna qaıtalanady.
Qanat ESKENDIR,
«Egemen Qazaqstan».
ALMATY.