12 maýsymda Qazaqstan Prezıdenti janyndaǵy Shetel ınvestorlary keńesiniń Býrabaıda ótken otyrysynda Elbasy N.Á.Nazarbaev Qazaqstanda 10 eldiń azamattary úshin vızasyz tártip ornatylatynyn jarııalady.
Qazaqstan Úkimeti 2014 jyldyń 15 shildesinen 2015 jyldyń 15 shildesine deıingi aralyqta AQSh, Nıderland, Ulybrıtanııa, Fransııa, Germanııa, Italııa, Malaızııa, Birikken Arab Ámirlikteri, Koreıa Respýblıkasy men Japonııa azamattary úshin vızasyz tártip ornatý boıynsha tıisti sheshim qabyldady.
Atalǵan aralyqta osy on eldiń dıplomatııalyq, qyzmettik, ulttyq tólqujattaryna ıe azamattaryna memlekettik shekarany ótkennen bastap 15 kúnniń ishinde kóprettik túrde Qazaqstan Respýblıkasynyń aýmaǵyna vızasyz kirip, shyǵyp, tranzıtpen ótýge múmkindik beriledi. Joǵaryda atalǵan elderdiń azamattary Qazaqstan Respýblıkasy aýmaǵynda 15 kúnnen artyq bolatyndaı dáıekti qajettilik paıda bolsa, olar zańmen bekitilgen tártip boıynsha Qazaqstannyń ishki ister organdarynda «iskerlik» sanattaǵy jáne Qazaqstan Syrtqy ister mınıstrliginde «ınvestorlyq» sanattaǵy tıesili vızalaryn alýy qajet.
2014 jyly 15 shildeden 2015 jyldyń 15 shildesine deıin vızasyz tártiptiń ornaýy alǵash engiziletin tájirıbe bolyp tabylady. Bul jobanyń iske asyrylýy qorytyndylary boıynsha Qazaqstan Úkimeti ony jalǵastyrý ne toqtatý týraly sheshimge keledi.
Qazaqstannyń bul bastamasy ekijaqty seriktestik qatynastardyń nyǵaıýyna, shetel iskerleri men týrısterge elimizde ońdy jaǵdaı týdyrýǵa baǵyttalǵan. Joba sheńberinde joǵaryda atalǵan elder azamattary Qazaqstanǵa vızasyz kelip, tarıhı, týrıstik jáne tabıǵı nazar aýdararlyq oryndaryn óz kózderimen kórip, Qazaqstan mádenıetimen jaqynyraq tanysyp, bıznes baılanystar ornata alady.
«Bul – ózge memlekettermen yntymaqtastyqty jeńildetýge, ınvestısııalardy tartýǵa jáne Astanadaǵy EKSPO-2017 halyqaralyq mamandandyrylǵan kórmesiniń qarsańynda halyqaralyq qatynasqa jaǵdaı jasaýǵa baǵyttalǵan elimizdiń erekshe qadamy», dep Qazaqstanda akkredıttelgen shetel elshilerimen jáne konsýldarymen kezdesýinde Qazaqstan Respýblıkasy Syrtqy ister mınıstriniń birinshi orynbasary – EKSPO-2017-niń ulttyq komıssary Rápil Joshybaev málimdedi.
Sonymen qatar, Qazaqstan vızasyz tártipti bir jaqty ornatyp, joǵaryda atalǵan jáne ózge de múddeli eldermen elimizdiń azamattary úshin vızalyq talaptardy jeńildetý boıynsha kelissózderdi belsendilendire túsedi.
«Bolashaqta, vızasyz elder tizimin keńeıtken kezde, Qazaqstan árbir elge kirerdegi vıza alý úrdisiniń qanshalyqty qıyn bolatyndyǵyna erekshe nazar aýdaryp, Qazaqstan azamattaryna vıza alý úshin ońdy jaǵdaı jasaıtyn elder úshin vızalyq tártipti alyp tastaıtyn bolady», dep atap ótti R.Joshybaev.
«Egemen-aqparat».