Qazaqstan Respýblıkasy Syrtqy ister mınıstriniń orynbasary Roman Vasılenko eki eldiń syrtqy saıası vedomstvolary arasyndaǵy saıası konsýltasııalarǵa qatysý úshin Astanaǵa saparmen kelgen Estonııa Syrtqy ister mınıstrliginiń Shyǵys Eýropa jáne Ortalyq Azııa departamentiniń Bas dırektory Marge Mardısalý-Kahar bastaǵan estondyq delegasııamen kezdesý ótkizdi, dep habarlaıdy Egemen.kz.
Kezdesý barysynda taraptar elder arasyndaǵy saıası, saýda-ekonomıkalyq jáne mádenı-gýmanıtarlyq salalardaǵy yntymaqtastyqty odan ári damytý joldaryn talqylady.
R.Vasılenko eýropalyq seriktesterdi eldegi saıası jáne áleýmettik-ekonomıkalyq reformalardyń iske asyrylý barysy, QR Parlamenti Májilisi depýtattarynyń aldaǵy saılaýǵa daıyndyǵy týraly jáne halyqaralyq uıymdar men sheteldik saılaý komıssııalary ókilderiniń, onyń ishinde Estonııanyń Respýblıkalyq saılaý komıssııasynyń tóraǵasy atyna joldanǵan shaqyrýlar jiberilgeni týraly habardar etti.
Qazaqstan men Estonııa turaqty saıası dıalogty jáne eki el basshylyǵynyń ózara saparlary arqyly yntymaqtastyqty odan ári keńeıtýge qyzyǵýshylyq tanytty.
Saýda-ekonomıkalyq jáne ınvestısııalyq yntymaqtastyq josparly túrde damyp keledi. Ekijaqty ózara is-qımyldyń basym baǵyttary ishinde – kólik, logıstıka, sıfrlandyrý jáne jasyl ekonomıka. 2022 jyly elder arasyndaǵy taýar aınalymy 121,9 mln AQSh dollaryna jetken. 2021 jyldyń sáıkes kezeńimen salystyrǵanda ol 6,4 ese ósti. Qazirgi ýaqytta Qazaqstanda óz qyzmetin 73 estondyq kompanııa júzege asyrady. Saýda-ekonomıkalyq baılanystardy damytý jolynda Ekonomıkalyq jáne ǵylymı-tehnıkalyq yntymaqtastyq jónindegi Qazaqstan-Estonııa úkimetaralyq komıssııasy mańyzdy ról atqarady.
QR SIM Eýropa departamentiniń dırektory Oljas Súleımenov teń tóraǵalyq etken saıası konsýltasııalar sheńberinde taraptar Qazaqstan men Estonııanyń ekijaqty jáne kópjaqty formatta da ózara is-qımyldy egjeı-tegjeıli talqylady. Sharttyq-quqyqtyq bazany odan ári keńeıtý, parlamentaralyq yntymaqtastyq pen halyqaralyq uıymdar sheńberindegi ózara is-qımyldy jandandyrý máseleleri boıynsha pikir almasty.
Kelissózder qorytyndysy boıynsha taraptar ekijaqty qatynastardyń barlyq spektri boıynsha yntymaqtastyqty odan ári keńeıtýge daıyn ekendigin rastady.