Maqtaaral aýdanyndaǵy Baýyrjan Momyshuly atyndaǵy №6 mektep-gımnazııanyń aty dúrkirep tur. Bul oqý ornyn Maqtaaraldyń altyn mektebi dese de ábden jarasady.
2010-2011 oqý jylynda UBT-nyń ortasha kórsetkishi – 108,87, 2011-2012 oqý jylynda – 102,4, 2012-2013 oqý jylynda – 107,64, 2013-2014 oqý jylynda 113,4 ball boldy.
Byltyr «Altyn belgige» úmitker 50 oqýshynyń 29-y, bıyl 38 oqýshynyń 27-si, ıaǵnı 71,5 paıyzy úmitti aqtady!
Ústimizdegi jyly UBT synaǵyna mektep-gımnazııany bitiretin 54 oqýshy, ıaǵnı 100 paıyzy qatysty. Joǵaryda keltirgenimizdeı, 27 túlek «Altyn belgi» aldy. Úzdik attestatqa úmitker 15 oqýshynyń bári de túgeldeı senimdi aqtap shyqty.
Bıylǵy 54 túlektiń 42-si barlyq pándi tek «5» degen baǵaǵa tapsyrdy.
Maqtaaraldyń B.Momyshuly atyndaǵy mektep-gımnazııasynda maqtanarlyq kórsetkish kóp. A.Bekmanova, E.Vegner, N.Júnisova, K.Sahıeva jetekshilik etetin synyptardan kóptegen oqýshylar eń joǵary kórsetkishterge ıe boldy. Nurlan Ertaev, Ásııa Aıkenje, Nurlan Nókerbek─123 ball, Dıana Tokaman, Malıka Babash, Dáýlet Ázim – 121 ball, Qorlan Serik, Aısulý Erkin 120 ball aldy. Sondaı-aq, 30 oqýshy 111-119, 15 oqýshy 100-110 aralyǵynda ball jınady.
Baýyrjan Momyshuly atyndaǵy mektep-gımnazııany kóp jyldan beri izdenimpaz, jańashyl ustaz О́mirhan Qozybaq basqarady. Shırek ǵasyrlyq muǵalimdik tájirıbesi bar dırektorǵa qazir búkil Ońtústik óńiri qyzyǵady. Mektep muǵalimderi de, shákirtteri de ózderin «Baýyrjanshyldarmyz!» deıdi. Qazaq eline, týǵan halqyna qaltqysyz qyzmet etý, naǵyz patrıot, abzal azamat bolmaqty paryz sanaıdy. Ultynyń namys týyna aınalǵan qaharman qolbasshy, tereń oıshyl, jaýynger jazýshy Momyshuly murattaryna adal bolýǵa umtylady.
«UBT synaǵyna daıyndalýda, «Altyn belgi» men úzdik attestatty kóbirek alýymyzda eshqandaı qupııa, jasyryn syr joq. Qupııa da, syr da tek shynaıy eńbekte, shyn izdeniste. Baýyrjan Momyshuly da shyndyq pen shynaıylyqty, erinýdi bilmes eńbekti bıik baǵalaǵan», desedi О́mirhan myrza jetekshilik etetin ujymdaǵy ulaǵatty ustazdar.
Mektepishilik basqarý júıesi zamanaýı zııatty jolǵa qoıylǵan. Mektep-gımnazııa jetekshisiniń tikeleı talapshyldyǵymen 10-11 synyp oqýshylarynan apta saıyn baıqaý synaǵy alynady. Tómen upaı kórsetken shákirttiń árqaısysymen, olardyń ata-analarymen suhbattar, saraptama jıyndary ótkiziledi. Solardyń qorytyndylaryna qaraı jumys jalǵasyn tabady.
2006-2007 oqý jylynan beri ár toqsan saıyn jáne jyldyq «+5» testi alynady. Bul júıeniń tıimdiligi kóp. Oqýshylardy testke daǵdylandyrady jáne árbir pán muǵaliminiń oqý baǵdarlamasyn qanshalyqty deńgeıde meńgerte alǵanyn aıqyndaıdy. Ár jyl saıyn pán muǵalimderi jańa suraqtarmen tolyqtyryp, jańa test varıanttaryn kiriktirip otyrady.
Mektep-gımnazııanyń taǵy bir ereksheligi – matematıka pánin oqytýǵa aıryqsha nazar aýdarady. Bul – tek osy pánge artyqshylyq jasaý emes. Matematıka arqyly ózge sabaqtardy oqytýdyń da sapasyn arttyra túsýdi maqsat etedi.
On bes muǵalim Kembrıdj ádis-tásili boıynsha arnaıy daıarlyqtan ótip kelip, tájirıbeni tyndyrymdy paıdalanýda.
Momyshuly mektebindegi Áshiraı Maralova, Tamara Qarabalaeva, Vahısha Isataeva, Klara Sarybaeva, Nurzada Álmetova, Nurzııa Qonysova, Ǵazıza Tólenbaeva, Jaýqazyn Saýytova, Zámıra Bıimbetova, Gúlvıra Ýálıeva, Maıra Janaeva, Nurgúl Jaqsybaeva, Aqnur Oraqbaeva, Aqmaral Bekmanova, Baǵdagúl Aıazbekova, Muhtar Bıimbetov, Sáken Jumaqov, taǵy basqa da muǵalimderdiń jas urpaqqa bilim men tárbıe berýdegi jalyqpas, jemisti jumystaryn jurtshylyq joǵary baǵalaıdy.
Mereıiń arta bergeı, Maqtaaraldyń altyn mektebi!
Marhabat BAIǴUT,
«Egemen Qazaqstan».
Ońtústik Qazaqstan oblysy.
Sýrette: OQO ákimi Asqar Myrzahmetov mektep-gımnazııada.