«Joǵary oqý oryndarynyń eýropalyq standart reıtıngi» boıynsha qazaqstandyq JOO ishinen joǵary baǵalanǵan 5 bilim ordasynyń biri – Qaraǵandy memlekettik tehnıkalyq ýnıversıteti bolashaq mamandardy halyqaralyq talap deńgeıinde daıarlaýmen birge tárbıe berý isine basa nazar aýdaryp keledi. Bul mańyzdy býynnyń basty baǵyty shyn mánindegi qazaqstandyq patrıotızmdi qalyptastyrý arqyly árbir jastyń júrek únimen de, kóńil sezimimen de óz elin damytý isine qatysý qajettigin uǵynýǵa, memleket keleshegi úshin birlese qyzmet jasaý azamattyq paryz ekenin kókirekke túıýge arnalyp otyr. Osy maqsattaǵy is-sharalar men mindetter joǵary oqý oryndary arasynda elimiz boıynsha birinshi ret ótkizilgen «Jańa qazaqstandyq patrıotızmge tárbıeleýdiń mańyzdy máseleleri» respýblıkalyq ǵylymı-praktıkalyq konferensııasynda eki kún boıy keńinen talqylandy. Bilim berý ordasynda stýdent jastarǵa burynǵy úlgilerdiń tálimdi tájirıbesin eskere otyryp, jańa qazaqstandyq patrıotızmniń asyl muraty – «Máńgilik El» ornyqtyrýda nysalanǵan otansúıgishtik tárbıe berý jumysynyń jańa tehnologııasyn jasaý qatysýshylar nazaryna usynyldy.
Elbasy «О́z boıymyzda jáne jas urpaqtyń boıynda jańa qazaqstandyq patrıotızmdi tárbıeleýimiz kerek. Bul eń aldymen elge jáne onyń ıigilikterine degen maqtanysh sezimin uıalatady» dep aıtqandaı, kópultty memlekettiń jalpyulttyq ıdeologııalyq negiz jóninde Parlament Májilisiniń depýtattary Svetlana Ferho, Kamal Burhanov, Abaı Tasbolatov, JOO rektorlary jáne tanymal ǵalymdar men ustazdar oı-tolǵamdaryn ortaǵa saldy. Patrıotızm el birliginiń ózegi bolsa, jastar sonyń dińgegi retinde sóz qozǵalyp, olardyń boıyna osynaý qasıetti sezimdi sińirý máseleleri alǵa tartyldy.
Konferensııaǵa qatysýshylar Qazaqstan Respýblıkasynyń Tuńǵysh Prezıdenti bilim alǵan atalǵan oqý ornynda stýdenttermen kezdesip, suraqtaryna jaýap berdi.
Aıqyn NESIPBAI,
«Egemen Qazaqstan».