Oqý-aǵartý mınıstrligi Qazaqstan Respýblıkasynyń keıbir zańnamalyq aktilerine bilim berý jáne bala quqyqtaryn qorǵaý máseleleri boıynsha túzetýler ázirledi, dep habarlaıdy Egemen.kz.
Zań jobasynyń maqsaty - Qazaqstan Respýblıkasynyń mektepke deıingi, orta, tehnıkalyq jáne kásiptik, orta bilimnen keıingi bilim berý, qosymsha bilim berý jáne balalardyń quqyqtaryn qorǵaý salasyndaǵy zańnamasyn jetildirý, sondaı-aq quqyqtyq olqylyqtardy, qaıshylyqtardy joıý.
Qujat mektepke deıingi, orta, tehnıkalyq jáne kásiptik, orta bilimnen keıingi, qosymsha bilim berý jáne balalardyń quqyqtaryn qorǵaý salasyndaǵy qoǵamdyq qatynastardy retteıdi.
Atap aıtqanda, muǵalimder men mektep dırektorlarynyń eńbegine aqy tóleý júıesin Úkimet emes, mınıstrlik aıqyndaıdy.
Pedagogpen eńbek shartyn jasasýdyń naqty merzimi (keminde 1 jyl) ony uzartý eseleriniń sanyn shektemeı belgilenedi. Eńbek shartynyń merzimi ótken kezde taraptar ony belgilenbegen nemese belgilengen merzimge keminde bir jylǵa uzartýǵa quqyly.
Sonymen qatar arnaýly áleýmettik qyzmetter kórsetý úshin baýyrlary men apa-sińlilerin, onyń ishinde týǵan jáne asyrap alǵan kámeletke tolmaǵan balalardy qospaǵanda, tórt baladan aspaıtyn bala tárbıeleýge qabyldaǵan otbasyna «patronattyq kásiptik otbasy» sanaty engiziledi.
«Neke (erli-zaıyptylyq) jáne otbasy týraly» kodekstiń jekelegen jańa babynda atasynyń, ájesiniń, baýyrlarynyń, ápkeleriniń jáne basqa da týystarynyń balasymen qarym-qatynas jasaý quqyǵy reglamentteledi.
Sondaı-aq baladan bólek turatyn ata-ananyń ata-ana quqyqtaryn júzege asyrý máseleleri Balalardyń quqyqtaryn qorǵaý salasyndaǵy ýákiletti organ aıqyndaǵan tártippen sheshiledi.
Balalardy asyrap alýshy kásibı otbasyna berý týraly shartta balany ornalastyrý merzimi (shuǵyl, qysqa merzimdi, uzaq merzimdi) aıqyndalatyn bolady.
Vedomstvoda atap ótilgendeı, zań jobasyn qabyldaý salalyq zańnyń memlekettiń ózekti múddelerine, qoǵamnyń suranystaryna jáne bilim berý men bala quqyqtaryn qorǵaý salasyn damytýdyń zamanaýı úrdisterine sáıkestigin qamtamasyz etedi.
Qujat 24 aqpanǵa deıin ashyq talqylaý úshin Ashyq NQA saıtynda ornalastyrylǵan.