Almatyda Qazaqstannyń IV qysqy Jastar sport oıyndary ótip jatyr. Búgin shańǵymen tuǵyrdan sekirýden úzdik jasóspirimder anyqtalyp, marapattaldy, dep habarlaıdy Egemen.kz Sportty damytý dıreksııasynyń baspasóz qyzmetine silteme jasap.
Sońǵy jarys kúni aralas komandalyq synda (2 qyz ben 2 ul) Almaty qalasynyń birinshi komandasy aıtarlyqtaı basymdyqpen jeńiske jetti. Odan keıingi orynǵa Almaty-2 komandasy men ShQO sportshylary turaqtady.
Jalpy esepte Almaty qalasy jeke-dara top jardy. Shyǵys Qazaqstan oblysy 2-oryn alsa, Almaty oblysy úzdik úshtikti túıindedi.
Barlyǵy «Suńqar» halyqaralyq shańǵy tramplınder kesheninde 4 óńirdiń (Almaty qalasy, ShQO, Jetisý jáne Almaty oblysy) 100-den astam sportshysy 5 jas sanatyna bólinip, synǵa tústi. Olar jekeleı synda K-20 (12 jas), K-40 (13-15 jas), K-60 (14-16 jas), K-95 (17-20 jas) tuǵyrynan sekirse, komandalyq báseke K-90 tramplıninde ótti.
«Jarys ózime qatty unady. Qıyn boldy dep aıta almaımyn. Dese de tartys sońyna deıin sozyldy. Shańǵymen tuǵyrdan sekirýge 6 jasymda kelgenmin. Bıyl osy sportpen aınalysqanyma 10 jyl bolady. Kýmırim – Danıl Vasılev. Jaqyn arada onymen birge jattyǵyp, birge óner kórsetýdi qalaımyn», dedi 3 altyn medal (jekeleı jáne komandalyq) jeńip alǵan almatylyq Ilıa Mızernyh.
Qazir endi Almatyda kıorlıngshiler sheberlik baıqasyp jatyr. 2 qala men 8 oblystan kelgen komanda (200-ge tarta jas sportshy) 2 topqa bólingen. Jeńimpaz ben júldegerler 12 aqpanda belgili bolady.
Jalpy bıylǵy keshendi jarys barysynda 11 sport túrinen úzdikter anyqtalady. Barlyq básekeden soń ár sport túrinen elimizdiń jastar quramasy jasaqtalyp, aldaǵy halyqaralyq resmı jarystarǵa, onyń ishinde 2024 jyly Ońtústik Koreıanyń Kanvondo qalasynda ótetin qysqy Jasóspirimder Olımpıadasyna baratyn sportshylar anyqtalady. Sondaı-aq 2026 jylǵy Mılandaǵy (Italııa) Olımpııa oıyndaryna sapaly daıyndyq júrgizýge qatysatyn myqty sportshylar irikteledi.
Oıyndardyń saltanatty ashylýy 23 aqpanda, saǵat 14:00-de Pavlodar qalasynda, al jabylýy 8 sáýir, saǵat 14:00-de Astana qalasynda ótedi.