Mádenıet jáne sport mınıstri Ashat Oralov nysana kózdeý sportynan Álem kýboginde top jarǵan sportshylardy marapattady. Jakartada márege jetken dúbirli dodada jerlesterimiz 11 júlde oljalap, tarıhı nátıjege qol jetkizdi.
Mınıstr mergenderdiń jetistikterin erekshe atap ótip, jattyqtyrýshylar quramyna alǵys aıtty. Sondaı-aq sportshylardyń Parıjdegi Olımpııa oıyndarynda laıyqty óner kórsetetinine senim bildirdi.
«Elimizdiń sportshylary alǵash ret nysana kózdeý jarysynda jalpykomandalyq esepte kósh basynan kórindi. Jas mergender Olımpıada chempıondarymen teń dárejede óner kórsetip, jarqyn jeńiske qol jetkizdi. Quramanyń jattyqtyrýshylary men ózge de mamandardyń jumysyn erekshe atap ótkim keledi. Sportshylardyń nysana kózdeýden ǵana emes, stendtik oq atýdaǵy jetistikteri ulttyq quramanyń aldaǵy Parıj Olımpıadasynda jaqsy nátıje kórsetetinine zor senim uıalatady», dedi mınıstr.
Álem kýboginde el quramasy atynan 15 sportshy (9 jigit jáne 6 qyz) óner kórsetti. Sport sheberleri men halyqaralyq dárejedegi sport sheberlerinen quralǵan komanda úsh altyn, bes kúmis jáne úsh qola júldemen jalpykomandalyq esepte birinshi oryndy ıelendi.
Altyn medal ıegerleri: Nıkıta Chırıýkın – myltyqtan 25 metrden jyldamdyqqa atý, Arına Altýhova – myltyqtan úsh pozısııadan atý (50 m), Aleksandra Le, Elızabet Bezrýkova jáne Anastasııa Grıgorevadan quralǵan áıelder komandasy – pnevmatıkalyq myltyqtan 10 metrden atý.
Kúmis medal alǵandar: Konstantın Malınovskıı – pnevmatıkalyq myltyqtan 10 metrden atý, Nıkıta Shahtorın, Konstantın Malınovskıı jáne Islam Sátbaev –pnevmatıkalyq myltyqtan 10 metrden atý, Nıkıta Chırıýkın, Valerıı Rahımjan jáne Alekseı Lotarev – pnevmatıkalyq myltyqtan 10 metrden atý, Konstantın Malınovskıı, Matveı Tımofeev, Islam Sátbaev – myltyqpen úsh pozısııadan atý (50 m), Arına Altýhova, Aleksandra Le, Elızaveta Bezrýkova – myltyqtan úsh pozısııadan atý (50 m).
Qola júldegerler: Irına Iýnýsmetova jáne Valerıı Rahımjan – PP-mıks, Irına Iýnýsmetova, Olga Aksenova jáne Sáýle Álimbek – 25 metrden myltyq atý, Elızaveta Bezrýkova jáne Islam Sátbaev – VP-mıks.
Jakartada ótken Álem kýbogi sportshylarǵa álemdik reıtıngtegi pozısııalaryn jaqsartýǵa, Olımpıadaǵa lısenzııa alý úshin talasqa túsýge múmkindik beretinin aıta ketken jón.