Ǵylym jáne joǵary bilim mınıstri Saıasat Nurbek tehnologııalyq serpiliske kedergi keltiretin negizgi máselelerdi atady, dep habarlaıdy Egemen.kz.
Bul rette Saıasat Nurbek vedomstvonyń otandyq ǵylymdy damytý aıasynda alǵa qoıǵan birqatar jańa mindetterine toqtalyp, ǵylymı ázirlemeler bıýdjetke qansha tabys ákeletinin de tilge tıek etti.
«Jobalardy ilgeriletý maqsatynda V2G – V2V – V2S ózara is-qımylynyń úshtik spıraly belgilendi. Mınıstrlik ǵylymı ázirlemelerdi kommersııalandyrý esebinen tehnologııalyq serpiliske kedergi keltiretin negizgi máselelerdi anyqtady. Olar – ǵalymdardyń bıznes-quzyretteriniń bolmaýy, ǵylym men kásipkerliktiń álsiz baılanysy, jeke qarjylandyrýdy izdeý tetikteri, óndiriske otandyq ınnovasııalardy engizýdiń tómen deńgeıi», dedi Saıasat Nurbek.
Mınıstrdiń aıtýynsha qazirgi ýaqytta óńirlerde ótinishterdiń azaıý úrdisin baıqaýǵa bolady.
Ol sondaı-aq Qazaqstan ǵalymdarynyń tabysyn arttyrý maqsatynda ǵylymı-tehnıkalyq jedeldetý tujyrymdamasy ázirlengenin qosa aıtty. Budan ózge qazaqstandyq ǵylymı ázirlemeler bıýdjetke 6 mlrd teńge tabys ákelgenin de atap ótý kerek.
«Halyq tabysyn arttyrýdyń 2025 jylǵa deıingi baǵdarlamasynyń 5-taraýy, 22-tarmaǵyn oryndaý maqsatynda ǵylymı-tehnıkalyq jedeldetý tujyrymdamasy ázirlenip, 2023-2025 jyldarǵa 1,5 mlrd teńgege bıýdjettik ótinim pysyqtaldy. Ǵylym qoryn osy bıznesti jedeldetý baǵdarlamasynyń operatory etip taǵaıyndaý durys bolar edi dep oılaımyz. MAK hattamalyq tapsyrmasyn oryndaý sheńberinde 5 jol kartasy ázirlendi. Aýyl sharýashylyǵy mınıstrligi, Densaýlyq saqtaý mınıstrligi men Energetıka mınıstrligi ónerkásipke kommersııalandyrý jobalarynyń nátıjelerin engizý boıynsha jumys júrgizilip jatyr», dep túıindedi mınıstr.