Úgit-nasıhat jumystaryna bıýdjetten qansha aqsha bólinedi?

OSK múshesi Sábıla Mustafına naqtylaǵandaı, respýblıkalyq bıýdjet qarajatynan kandıdattardyń saılaýaldy baǵdarlamalarmen BAQ-ta sóıleýge, saılaý aldyndaǵy jarııa is-sharalardy ótkizýge jáne úgit materıaldaryn shyǵarýǵa arnalǵan shyǵystary, sondaı-aq kandıdattardyń OSK belgileıtin mólsherdegi kólik shyǵystary jabylady. Partııalyq tizimder boıynsha úmitkerlerge respýblıkalyq bıýdjet qarajatyn bólý kózdelmeıdi.

«Parlament Májilisiniń depýtattyǵyna kandıdattar úshin partııalyq tizimder boıynsha úmitkerlerden basqa shyǵystardyń mólsheri 950 000 teńge kóleminde belgilenedi. Onyń ishinde baǵdarlamamen teledıdar men radıoda sóıleýge, sondaı-aq merzimdi baspasózde nemese jelilik basylymdarda 2 maqala jarııalaýǵa – 450 000 teńge, jarııa is-sharalar ótkizýge jáne úgit materıaldaryn shyǵarýǵa - 300 000 teńge, kólik shyǵystaryna - 200 000 teńge», dedi OSK múshesi Sabıla Mustafına.

Oblystyq, respýblıkalyq mańyzy bar qalalar men astana máslıhattarynyń depýtattyǵyna kandıdattar úshin partııalyq tizimder boıynsha úmitkerlerden basqa shyǵystar mólsheri 550 000 teńge kóleminde bekitildi. Onyń ishinde baǵdarlamamen teledıdarda, radıoda sóıleýge, merzimdi baspa nemese jelilik basylymdarda 2 maqala jarııalaýǵa - 350 00 teńge, saılaý aldyndaǵy jarııa is-sharalardy ótkizýge jáne úgit materıaldaryn shyǵarýǵa – 130 000 teńge jáne kólik shyǵystary - 70 000 teńge.

Respýblıkalyq bıýdjetten jabylatyn shyǵystar qalalyq máslıhattarǵa kandıdattar úshin 350 000 teńge mólsherinde bekitildi. Onyń ishinde baǵdarlamamen teledıdarda, radıoda sóıleýge, merzimdi baspa nemese jelilik basylymdarda 2 maqala jarııalaýǵa - 200 00 teńge, saılaý aldyndaǵy jarııa is-sharalardy ótkizýge jáne úgit materıaldaryn shyǵarýǵa – 100 000 teńge jáne kólik shyǵystaryna - 50 000 teńge belgilendi.

OSK atap ótkendeı, barlyq esepteýler BAQ jáne basqa uıymdar usynǵan baǵalardy taldaý negizinde jasalǵan.