2022 jyldyń qorytyndysy boıynsha álemdik avtonaryq kórsetkishi 2021 jyldyń kórsetkishine jaqyndaı almady. Byltyr búkil álemde dıllerler 81 mln jańa avtokólik satqan, bul 2021 jyldyń kórsetkishinen 0,6 paıyzǵa tómen. Qazir álemdik avtomobıl naryǵynyń lıderi atanyp turǵan Qytaıdyń da bul baǵyttaǵy kórsetkishi máz emes.
AQSh-ta satylym – 7,8 paıyzǵa, 13,7 mln avtokólikke, Batys Eýropada 6,2 paıyzǵa, 11,6 mln kólikke qysqarǵan. Japonııada byltyr 1977 jyldan bergi eń tómen satylym kólemi tirkeldi: nebári 4,2 mln avtokólik saýdalanypty. Bul 2021 jyldan 5,2 paıyzǵa az. Al kólik satylymynyń qysqarýy tórtinshi jyl qatarynan baıqalyp otyr.
Aıtarlyqtaı quldyraý Shyǵys Eýropada baıqaldy deıdi sarapshylar. Bir jylda 26,8 paıyzǵa, 2,9 mln kólikke tómendegen. Buǵan Ýkraınadaǵy soǵystyń áser etkeni anyq. Al Reseıdiń ózindegi satylym birden 60 paıyzǵa keri ketken.
Qazaqstanda jańa jeńil kólikter men jeńil kommersııalyq tehnıka satylymy 5,3 paıyzǵa ósip, 2022 jyldyń qańtar-jeltoqsanynda 123,8 myń birlik tehnıkany qurady. Eń kóp satylǵan úlesi Chevrolet (34,3 myń) pen Hyundai (28,9 myń) enshileıdi. Byltyrmen salystyrǵanda Chevrolet satylymy 17,8 paıyzǵa, Hyundai satylymy 27 paıyzǵa ósken. TOP-5 qataryna Kia (14,4 myń), Toyota (9,6 myń) jáne Lada (7,4 myń) kiredi. Úzdik ondyq qatarynda tórt birdeı qytaı kóligi bar, olar – Chery (4,5 myń), Jac (3,4 myń), Exeed (1,9 myń) jáne Haval (1,5 myń).
«Model bólinisi boıynsha, satylymnyń kósh basynda Chevrolet Cobalt (23,2 myń), Hyundai Tucson (8,9 myń) jáne Chevrolet Nexia (7,1 myń) tur. TOP-10 qataryna Tucson-nan bólek Hyundai-dyń 4 modeli (Elantra, Sonata, Accent jáne Santa Fe), sondaı-aq Toyota (LC Prado), Kia (Sportage) jáne Lada-nyń (Granta) bir-bir modeli kiredi», dep jazady Energyprom.
2022 jyldyń sońǵy aıynda álemdik satylym qaıtadan ósim kórsetken. Bul aıda jahan boıynsha 7,4 mln kólik satylyp ketken. 2021 jyldyń jeltoqsanymen salystyrǵanda 0,1 paıyzǵa artyq. О́sim Batys Eýropada (12,8 paıyz, 1,1 mln kólik), AQSh pen Kanadada, Latyn Amerıkasy, Japonııa jáne Koreıada da baıqalǵan. Qazaqstan da bul ósimge ilesti. Byltyr jeltoqsanda elimizde 13,8 myń kólik satylymǵa shyǵarylǵan.
Árıne, joǵaryda jıi satylym jatyr degen kóliktiń kóbi bizde nesıe arqyly beriledi. Bul halyq ál-aýqatynyń asa joǵary emes ekenin ańǵartsa kerek.
Qazir otandyq avtonaryqtyń jaı-kúıi kóńil tolarlyqtaı emes. Eldegi avtopark ábden eskirdi. 1990-2000 jyldar aralyǵyndaǵy tozǵan kólikterdiń ózi 2 mln teńgeden kem suramaıdy. Sarapshylar Qazaqstandaǵy árbir ekinshi kóliktiń jasy 20-dan asyp ketkenin aıtady. Elimizde tirkelgen 3,9 mln avtokóliktiń 2,8 mln-y júrilgenine 10 jyldan asqan tehnıka quraly bolyp sanalady. Olardyń úshten biri úsh óńirge tıesili – Almaty oblysy (406,6 myń dana), Almaty (310,6 myń) jáne Shyǵys Qazaqstan oblysy (211,8 myń). Bul rette óńirlik avtoparktegi 10 jyldan asqan avtokólikterdiń eń kóp úlesi Jambyl (86,7 paıyz), Jetisý (85,9 paıyz) jáne Almaty (84,1 paıyz) oblystarynda.
20 jastan asqan, ádben eski kólikterdiń sany 2 mln-ǵa jýyqtaıdy. Olardyń jartysyna jýyǵy bes oblysta eken: Almaty oblysynda (317,8 myń dana), Almatyda (177,2 myń), Qaraǵandy (157,3 myń), Shyǵys Qazaqstan (154,9 myń) jáne Jambyl (145 myń) oblystarynda.