Túrkııanyń Gazıantep qalasyndaǵy aýrýhanalardyń birinde jer silkinisiniń alǵashqy mınýttary beınekamaraǵa túsip qaldy. Sol sátte kezekshi medbıkelerdiń biri naýqas sábılerdi qutqarý úshin júgire jónelgen, dep habarlaıdy Egemen.kz TRT Haber agenttigine silteme jasap.
Jelide taraǵan vıdeo kadrlarynan medbıkeniń jer silkinisi kezinde aýrýhanadan qashyp ketpeı, naýqas sábılerdi qutqarýǵa júgirgenin baıqaýǵa bolady. Bul medbıkeniń esimi - Seıma Alakých.
«Jer silkingen kezdegi meniń mindetim naýqastarǵa barý edi. О́ıtkeni olardy qorǵaı alamyn dep oıladym. Ýaqyt tyǵyz bolǵandyqtan, jedel túrde oılanbastan áreket ettim. Sebebi ári qaraı ne bolatyny belgisiz edi. Qolymnan kelgenin jasap naýqastardy syrtqa alyp shyqtym. Bul sol kezde oılaǵan jalǵyz nárse edi. Úsh palatada meniń naýqastarym jatty. Bir naýqas meniń jer silkinisi týraly aıǵaılaǵanymdy estip, ózi shyǵypty. Jer silkindi dep aıǵaıladym, biraq olardyń qorqyp, dabylǵa salynbaýyn da oıladym. Mundaı kezde óziń týraly oılamaıdy ekensiń. Seniń kómegińe zárý adamdar bolady. О́ıtkeni mundaı sátte nemen betpe-bet kelerińdi bilmeısiń. Eger sol kezde qashyp ketsem, ómir boıy arym mazalaýshy edi. Qandaı jaǵdaı bolsa da, mindetimdi oryndap, naýqastarymdy qutqarýym kerek. Bizdiń aýrýhanada naýqastarymyz árdaıym birinshi orynda turady. Sol túni de júregim sezip, osynda keldim», dedi Seıma Alakých sheteldik BAQ ókilderine bergen suhbatynda.
Mamandyǵyna adal dáriger Seıma Alakýchtyń bul áreketi álem jurtshylyǵynyń rızashylyǵyn aldy. Jelide kóptegen oqyrmandar boıjetkenge alǵys aıtyp, tek sáttilik tiledi.