Jańasha oqý júıesi

WorldSkills – jumysshy maman­dyqtary boıynsha kadrlardy daıarlaý sapasyn arttyrýǵa jáne olardy jas­tar arasynda tanymal etýge baǵyt­talǵan halyqaralyq qozǵalys. Qazaq­stan jumysshy mamandardy daıarlaý salasyndaǵy úzdik praktıkalardyń benchmarkıngi úshin bul qozǵalysty odan ári damytatyn bolady.

Jetisý oblysy ákimi baspasóz qyzmetiniń málimetine súıensek, jýyrda Taldyqorǵan servıs jáne tehnologııalar kolledjiniń bazasynda «Tamaqtandyrýdy uıymdastyrý» mamandyǵy boıynsha aspazdyqta oqıtyn óńir kolledjderiniń stýdentteri úshin 8 kúndik oblystyq taǵylymdama uıymdastyryldy. Is-sharaǵa óńirdegi 7 kolledjden 40-qa jýyq stýdent pen oqytýshy qatysqan.

Teorııalyq jáne praktıkalyq bólimderden turatyn taǵylymdamadan Kóksý polıtehnıkalyq, Alakól gý­ma­­nıtarlyq-tehnıkalyq, Sarqan po­lıtehnıkalyq, Tekeli kásiptik, Bas­tóbe servıstik-tehnıkalyq, Jar­kent kópsalaly, Aqsý polıteh­nıka­lyq kolledjderiniń 34 stýdenti men oqytýshysy ótken. Olar aspaz maman­dyǵyn oqyp júrgen bilimgerler men osy mamandyq boıynsha bilim beretin óndiristik oqytýdyń sheberleri. Bul rette taǵylymdamanyń teorııalyq bóligi onlaın-rejimde, al praktıkalyq bóligi Taldyqorǵan servıs jáne tehnologııalar kolledjiniń quzyrettilik ortalyǵynyń sheberhanalarynda uıymdastyryldy. Sabaqtardy jer­gilikti pedagogter men óndiristik oqytý sheberleri ótkizdi.

Taǵylymdamany uıymdas­tyrý­daǵy basty maqsat – zamanaýı úr­disterdi eskere otyryp, tamaq daıyn­daý táji­rıbesin qalyptastyrý. Bul rette ne­gizinen jeke tulǵany, onyń shyǵar­mashylyq qabiletterin da­mytýǵa, kásip­tik bilim berý sapasy men jas ári bolashaq mamandardyń kásibı sheber­ligin arttyrýǵa ekpin túsirilip otyr.

Is-shara aıasynda bilimgerler jeń­sik taǵamdardy, túrli soýstardy, ba­lyqtan jasalatyn as-aýqattardy qalaı ázirleıtinin úırendi. Sondaı-aq qoǵamdyq tamaqtandyrýdy uıymdas­tyrý salasynda qoldanylatyn kásibı leksıkany qoldaný daǵdylaryn jetil­dirýmen aınalysty.

Daıyndalǵan taǵamnyń massasyn kórsete otyryp, olardyń tehno­logııalyq kartalaryn jasady. Oqytý men onyń nátıjelerin ba­ǵalaýdyń úderisi tolyǵymen WorldSkills standarttaryna negizdelgenin atap ótý kerek. Taǵy­lymdama aıaqtalǵannan keıin barlyq qatysýshyǵa quzyret or­talyqtarynan sertıfıkat berildi.

– 23 qańtar men 2 aqpan aralyǵynda Taldyqorǵanda «Aspazdyq is» quzy­rettiligi boıynsha taǵylymdama ótti. Bizdiń oqytý jáne praktıkalyq sabaqtarymyz WorldSkills chempıo­natynyń standarttary men tapsyrmalaryna sáıkes ótkizildi. Maǵan sheberhanalardyń ornalasý reti, jańa jabdyqtarmen jumys isteý, zamanaýı aspazdyq ónerdiń qyr-syryn meńgerý qatty unady. Jalpy, oqytý atmosferasy erekshe áser etti. Sabaqtar shyn máninde qyzyqty ári paıdaly, eń bastysy jańa tásilderdi engize oty­ryp ótkizildi, – deıdi Kóksý polıteh­nıkalyq kolledjiniń III kýrs stýdenti Marjan Temirhan.

Muǵalimder de dán rıza. Solardyń biri Alakól gýmanıtarlyq-tehnıkalyq kolledjiniń óndiristik oqytý sheberi Roman Mıshenınniń pikirinshe, mundaı tájirıbe almasýlar zamanaýı qural-jabdyqtar men tehnologııalarǵa qoly únemi jete bermeıtin shalǵaı aýdandarda ornalasqan oqý oryndary úshin asa mańyzdy ári olardaǵy oqý úderisin jańartýǵa yqpal etedi.

Aldaǵy ýaqytta ártúrli baǵyt boıynsha túrli nysandar men ádiste­melerdi paıdalana otyryp, osyndaı taǵylymdamalar quzyret ortalyq­tarynda únemi ótkizilip turady. Mysaly, Taldyqorǵan joǵary polıtehnıkalyq kolledjiniń quzyrettilik ortalyǵy bazasynda IT-tehnologııalar, qurylys salasy baǵyttarynda, al Taldyqorǵan gýmanıtarlyq-tehnıkalyq kolledjiniń bazasynda «Jıhaz óndirisi» mamandyǵy boıynsha praktıkalyq sabaqtar ótkiziledi.

Jetisý oblysy