Memlekettik tildi damytý qorynyń Soyle.kz komandasy «Kazsınk» JShS-nyń qoldaýymen balalarǵa arnalǵan tapsyrmalary, jattyǵýlary jáne oıyn sımýlıatorlary bar ınteraktıvti oıyn túrindegi alǵashqy biregeı «Tátti alma» onlaın-platformasyn iske qosty, dep habarlaıdy Egemen.kz.
Platforma 4 jastan 10 jasqa deıingi balalarǵa, ata-analarǵa, bastaýysh synyp muǵalimderine, balabaqsha tárbıeshilerine, balalar ortalyqtarynyń oqytýshylaryna arnalǵan.
Platformanyń biregeıligi - alǵashynda balalar saıtty eresekterdiń kómegimen meńgerse, keıin sabaqty óz betinshe jalǵastyra alady.
Sondaı-aq saıtta mektepke deıingi jáne bastaýysh mektep mekemeleri úshin qazaq jáne orys tilderinde oqytýdyń ózekti dıdaktıkalyq materıaldary bar. Balalarǵa arnalǵan 6 tomdyq «Tátti alma» jınaǵynyń kórkem shyǵarmalaryn atalmysh saıttyń «Kitaphana» bóliminen oqýǵa bolady.
Qazirgi ýaqytta №1 Soyle.kz onlaın-portalynda álemniń túkpir-túkpirinen 300 myńǵa jýyq paıdalanýshy qazaq tilin úırenip jatyr.