Rýdnyıdaǵy arnaıy áleýmettik qyzmet kórsetý ortalyǵynda turatyn Igor Velıkov aǵashtan oıyp, neshe túrli oıynshyq pen músin jasaıdy. Kezinde jazataıym poıyzdyń astyna túsip, saýsaqtaryn túbinen kestirip tastaǵan ol qoldyń kemtarlyǵy qolónermen aınalysýǵa kedergi emes, deıdi.
Baıaǵyda beltemirge asylǵan aǵash qoıan bolýshy edi. Oıynshyq týrnıkti ustap eki jaǵynan qyssań, álgi qoıan neshe túrli óner kórsetetin. Bala kezimizde talaı qyzyqtadyq, biraq bizden keıingi balalar mundaı oıynshyqty kórmeı ósti. Igordiń qolynan shyqqan osy oıynshyq balalyq shaqtyń bal kúnderin eske túsirip, kózge erekshe ystyq kórinedi.
Qolóner sheberi jasaǵan kúshik músinderi uıaly telefon qoıýǵa arnalǵan. Kompıýterde jumys istep otyrsańyz, telefonyńyzdy tikesinen qystyra salýǵa yńǵaıly. Esesine, ózińizge túsip jatqan habarlamalardyń bárin kóz qıyǵymen qalt jibermeı kórip otyrasyz.
– Kishkentaı kezimde ákem ártúrli aǵash oıynshyqtar jasaıtyn. Men únemi janynan shyqpaıtynmyn. Keıin eseıe kele ózim de aǵash jonyp, usaq-túıek turmystyq zattar men oıynshyqtar jasaı bastadym. Aǵash oıyp, qolóner buıymdaryn jasaǵandy janym jaqsy kóredi. Bala kezden súıekke sińgen nárse ǵoı, saýsaqtarymnyń joqtyǵy esh kedergi emes. Eń bastysy zeıin qoıý kerek. Aǵash tabý qıyn. Kóbine qaraǵaıdan jasaımyn. Lak, boıaý sııaqty kerekterdi ózim satyp alamyn. Elektr lobzıgim, qolara, qashaýym bar, sol jetip jatyr, – deıdi sheber.
Osy ýaqytqa deıin sheberdiń qolynan shyqqan qolóner týyndylarynda san joq. Ol dúnıelerdiń deni syılyq retinde árkimniń qolynda ketipti.
Aragidik bireýdiń týǵan kúni bolǵanda nemese ártúrli qýanyshtarǵa oraı, jeke azamattardan, keıbir mekeme ujymdarynan tapsyrys túsip qalady eken. Sheber suraǵandaryn jasap beredi. Biraq bálenbaı teńge dep aqsha surap, eńbegin buldamaıdy, bergenin ǵana alady.
Igor keıde ortalyq uıymdastyratyn jármeńkelerge shyǵyp turady. Onda da unatqan adamǵa oıynshyǵyn satpaı, syılaı salady eken.
Qostanaı oblysy