Qazaqstan Halyq partııasy tóraǵasynyń orynbasary Ashat Asylbekov Almaty oblysynyń Eńbekshiqazaq aýdanyna qarasty Shelek aýylynyń saılaýshylarymen kezdesti. Aıta ketý kerek, partııanyń saılaýaldy baǵdarlamasynda agroónerkásip keshenderin, aýyldyq aımaqtardy damytýǵa aıryqsha kóńil bólingen.
«Biz – qalalar men aýyldardyń taza aýasy, sáýletti kelbeti úshin kúresemiz. Árbir eldi meken taza aýyz sýǵa qol jetkizýge tıis. Sýmen jabdyqtaý máselesi de ulttyq qaýipsizdiktiń mańyzdy máselesine aınalyp otyr», dedi Ashat Asylbekov.
QHP osy máseleni baqylaı alatyn sý resýrstary mınıstrligin qurý qajet dep sanaıdy. Tipti shalǵaı aýyldarǵa keń jolaqty ınternet te júrgizý qajet. «Aýyldyq aımaqtardy damytý máselelerin Ulttyq ekonomıka mınıstrliginen alyp, Aýyl sharýashylyǵy mınıstrligine berý kerek. Sonymen qatar óńirlik agroındýstrııalyq klasterlerdi, agroónerkásip keshenderi men aýyldyq aımaqtardy damytýdyń biryńǵaı kartasyn ázirleý qajet. Osylaısha, myńǵa jýyq eldi meken is júzinde aýqymdy qurylys alańyna aınalady. Jappaı qurylys júrgizilip, jańa jumys oryndary ashylady», dep esepteıdi partııa basshylyǵy.
Al Qazaqstan Halyq partııasynan Parlament Májilisi depýtattyǵyna kandıdat Magerram Magerramov Pavlodar óńirindegi saılaýshylarmen kezdesti. Úmitker «Pavlodar munaıhımııa zaýyty» JShS-nyń ujymyna partııanyń saılaýaldy baǵdarlamasyn tanystyrdy.
– Qazaqstan Halyq partııasy jaldamaly jumysshylardyń, qyzmetkerlerdiń áleýmettik quqyǵyn qorǵaý jolynda kúresip keledi. Biz qýatty orta taptyń qalyptasýyn qoldaı otyryp, tabıǵı shıkizatty – munaı-gaz, munaı-hımııa, taý-ken metallýrgııasyn óndirý jáne óńdeý salasy eńbekkerlerin de nazardan tys qaldyrmaımyz. Búginde el ekonomıkasyndaǵy Qazaqstannyń taý-ken metallýrgııa kesheni IJО́-niń shamamen 10 paıyzyn, ónerkásiptik óndiristiń jáne barlyq eksporttyń 25 paıyzyn quraıdy. Salada 200 myńnan astam jumysshy eńbek etedi. Qyzmetkerlerdiń 90 paıyzǵa jýyǵy kásipodaqqa múshe. Olardyń áleýmettik-eńbek quqyqtary ujymdyq sharttarda jáne salalyq kelisimde kórsetilgen, – dedi M.Magerramov.