Spartakıadada Qazaqstannyń barlyq óńirlerinen 14 pen 18 jas aralyǵyndaǵy jasóspirimder baq synasty, dep habarlaıdy Egemen.kz.
Qatysýshylardy saltanatty túrde marapattaý rásimi Armııa úıinde ótti. «Jas sarbaz» respýblıkalyq áskerı-patrıottyq qozǵalysynyń tárbıelenýshilerin jarystyń aıaqtalýymen ataqty sportshylar – Olımpıada chempıony Olga Rypakova men álem chempıonatynyń qola júldegeri, dzıýdoshy Ǵusman Qyrǵyzbaev quttyqtady.
Jarys 3 shaqyrymǵa shańǵy tebý, pnevmatıkalyq myltyqtan oq atý, mańdaıshada tartylý, deneni shalqasynan jatyp kóterý saıystarynan turdy.
Jeke birinshilikte 14 jastaǵy jasóspirimder arasynda Abaı oblysynan kelgen Mıhaıl Belenkov, 15-16 jasta – Soltústik Qazaqstan oblysynyń namysyn qorǵaǵan Roman Jerebılo, 17-18 jasta - Batys Qazaqstan oblysynan kelgen Roman Harchev chempıon atandy.
14 jas sanatyndaǵy qyzdar arasynda Abaı oblysynan Darıa Devıatkova, 15-16 jas aralyǵynda Batys Qazaqstan oblysynan kelgen Natalıa Panova, 17-18 jasta astanalyq Aleksandra Krýtova úzdik shyqty.
Komandalyq esepte Soltústik Qazaqstan oblysynyń quramasy jeńiske jetti. Ekinshi oryndy Batys Qazaqstan oblysynyń komandasy, úshinshi oryndy Astana qalasynyń komandasy ıelendi.
- Spartakıada ataýynyń ózinde tereń maǵyna jatyr. Qalqan - qorǵan degen sóz. Bul árqashanda sportty janyna serik etetin, myqty, shymyr, epti bolashaq Otan qorǵaýshylardyń saıysy. Osyndaı is-sharalarǵa qatysa otyryp, balalar jaqsy tájirıbe jınap, aldyna jańa maqsat qoıyp, tipti dostar tabady. Aldaǵy ýaqytta bul jobaǵa qoldaý kórsetiletinine senimdimin, - dep óz oıymen «Jas sarbaz» áskerı-patrıottyq qozǵalysynyń tóraǵasy kapıtan Meıirbek Meńdiǵalıev bólisti.
Is-shara Almaty qalasyndaǵy Ulttyq áskerı-patrıottyq ortalyq pen «Jas sarbaz» balalar stýdııasy fılıalynyń shyǵarmashylyq ujymy daıyndaǵan konsertpen aıaqtaldy.