2023 jyldyń qańtar aıynda ekinshi deńgeıli bankter men banktik emes jekelegen aıyrbastaý pýnktterinde jalpy salmaǵy 79,5 kılo bolatyn 2 364 altyn quıma satyldy.
Halyqqa tazartylǵan altyn quımalardy satý jáne satyp alý baǵdarlamasyn Ulttyq Bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 3,9 tonna tartatyn 115 209 altyn quıma satylypty.
Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi 26% – 29 723 dana. Odan keıin 5 gramdyq altyn quıma – 25 538 dana (22%), 100 gramdyq quıma – 23 460 dana (20%), 20 gramdyq quıma – 23 131 dana (20%) jáne 50 gramdyq quıma – 13 357 dana (12%). Altyn quımalar Almaty, Astana jáne Atyraý qalalarynda kóp satylǵan.
Altyn quıma – senimdi ınvestısııa quraly. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnktteri klıentke aqshany sol kúni tóleı otyryp, quımalardy keri satyp ala alady.
Baǵdarlama bastalǵannan beri ekinshi deńgeıli bankter men banktik emes jekelegen pýnktter jalpy salmaǵy 484,6 kılo bolatyn 19 228 altyn quımany keri satyp aldy, bul – jalpy satylǵan quımalardyń 17%-y. Keri satyp alynǵan quımalardyń barlyǵy Ulttyq Banktiń aýmaqtyq fılıaldary arqyly halyqqa satylady.
Árbir quıma qorǵaý elementterimen qaptalǵan (quımanyń aına beti, mıkrotekst hám jıegi bar) jáne arnaıy qorappen shyǵady. Sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap sapa sertıfıkaty bolyp ta sanalady. Sondyqtan altyn quımany uqyppen saqtap, qorabyn búldirmeýge keńes beremiz.
Altyn quımalardy Halyk Bank-ten, Eýrazııalyq Bankten, Jusan Bank-nen, SentrKredıt Bankinen, sondaı-aq banktik emes jekelegen pýnktterden de satyp alyp, keri satýǵa bolady.