Jalpyulttyq sosıal-demokratııalyq partııasynyń tizimi boıynsha kandıdat Talǵat Omarov «Astana sý arnasy» kásiporny ujymymen úgit-nasıhat kezdesýin ótkizdi.
– Qazaqstanda baı ári tabysty bolýdyń myzǵymas sharttary eshkimge jasyryn emes – árkimniń ıeligińde ne bank, ne paıdaly qazba orny bolýy kerek. Mundaı ıgilikterdi bıliktegilerge – sheneýnikterge, olardyń týystaryna ne dostaryna bir taban jaqyn bolsań ıelenesiń. Korporatıvtik, olıgarhııalyq ekonomıka memlekettiń básekege qabilettiligin tómendetedi. Ony basqaratyndar balama, qaıta óńdeý sektorlarynyń damýyna, kásiporyn qojalarynyń myqty tabynyń qalyptasýyna qyzyǵýshylyq tanytpaıdy. Sanaýlylardyń paıdaǵa kenelip, mıllıondaǵan adamnyń kedeılikte kún keshýi – naǵyz teńsizdik. Biz egjeı-tegjeı tekserý júrgizip, urlanyp, offshorǵa jasyrylǵannyń bárin elimizge qaıtarýǵa mindettimiz. Jobamen eseptegenniń ózinde Ulttyq qordyń úsheýine teń keletin áleýet shetelde jatqany málim. Bul – azamattarymyzdyń aqshaǵa shaqqandaǵy bolashaǵy. Ekonomıkalyq resýrstardyń zańsyz shoǵyrlanýyna qarsy is-qımyl máseleleri jónindegi vedomstvoaralyq komıssııa quramyna bizdi qosýyn talap etemiz. Biz 90-jyldardaǵy jekeshelendirýden mol paıdaǵa kenelgen iri bıznesmenderdi IPO ótkizip, orta kásipkerlerge aktıvterin bólip berýin talap etemiz, olar bolsa ekonomıkamyzdyń jańa býynyna aınalady. Bankrotqa ushyrasa, ekonomıkaǵa zııany tıip ketetin kompanııalar bizge qajet emes. Strategııalyq qor men jer qoınaýyn baqylaý úshin tabıǵı qazbalardy óndirý jáne eksporttaýmen aınalysatyn salalardy birte-birte memlekettendirýge baıqaý jarııalanady. Ulttyq óńdeýshi ónerkásipke basymdyq beriledi. Ádiletsiz kelisimsharttar qaıta qaralatyn bolady, al elimiz úshin kesirin tıgizetin sharttar buzylatyn bolady. Barlyq kelisimshart tek Qazaqstan aýmaǵynda jasalady jáne tirkeledi, al olar boıynsha barlyq tólemder tek otandyq rezıdent bankter arqyly júrgiziledi. Bul másele partııanyń basty nazarynda, – dedi kandıdat.