Elimizde jastar jumyssyzdyǵy 3,8 paıyzdy quraıdy. Resmı derekke súıensek, respýblıka boıynsha jumyssyz jastardyń basym bóligi – Astana qalasynda. О́zekti máseleniń túıinin tarqatý úshin jaýaptylar elordanyń bes aýdanynda birtindep «Jastarǵa qyzmet kórsetý ortalyǵyn» ashýdy qolǵa alyp otyr.
Mundaǵy basty maqsat – memlekettik jastar saıasatyn júzege asyrý, jastardy qoldaýǵa baǵyttalǵan memlekettik baǵdarlamalar jáne jastar arasyndaǵy jumyssyzdyq, turǵyn úı, bilim, densaýlyq jáne taǵy basqa da baǵyttar boıynsha konsýltatıvtik kómek kórsetý. Jastarǵa qyzmet kórsetý ortalyǵy alǵash bolyp Esil aýdanynyń Qabanbaı batyr dańǵyly, 58b mekenjaıynda saltanatty túrde ashyldy.
– Jalpy, jastar saıasatynyń basty jumystarynyń biri – olarǵa jan-jaqty qoldaý kórsetý, baǵyt-baǵdar berý. Osy baǵytta ótken jyldan bastap, elorda jastaryna keńes berý, jumysqa ornalastyrý maqsatynda «Jastarǵa qyzmet kórsetý ortalyqtary» kómek kórsetip keledi. Mysaly, byltyr tórt aýdannan bes ortalyq ashyldy. Biz bir jyldyń ishinde 10 myńǵa jýyq jasqa keńes berdik. Nátıjesinde, 3,5 myńǵa jýyq azamatty jumysqa ornalastyrdyq. Mamandardyń jol silteýimen úıli bolǵandary da bar. «Elorda jastary» baǵdarlamasy boıynsha jastarǵa 5 paıyzdyq jeńildetilgen nesıe beriledi, – dedi Astana qalasy jastar saıasaty basqarmasynyń basshysy Qaırat Qambarov.
Ortalyqta memlekettik turǵyn úı baǵdarlamalary, jumysqa ornalasý máseleleri, volonterlik qyzmet, jastar bastamalaryn qoldaý, quqyqtyq jáne psıhologııalyq kómek kórsetiledi. Munda kovorkıng bólimi de jumys isteıdi.
– Bizge jastar áleýmettik jeliler arqyly da baılanysqa shyǵady. Onda suranysqa ıe bos jumys oryndary jarııalanyp otyrady. Osy rette jumys qyzyqtyrǵan oqyrmandarǵa birneshe múmkindikti qarastyryp, olardyń poshtalaryna joldaımyn, – dedi «Astana jastary» jastar resýrstyq ortalyǵynyń qyzmetkeri Jangúl Qambar.