Shýaqty kóktemniń shyraıly merekesi 8 naýryz – Halyqaralyq áıelder kúni qarsańynda Aqparat jáne qoǵamdyq damý mınıstri Darhan Qydyráli azamattyq qoǵam salasynda qyzmet atqaryp júrgen birqatar qyz-kelinshekti quttyqtap, Memleket basshysynyń quttyqtaý hatyn tapsyrdy.
Jıynǵa mınıstrlikke qarasty mekemelerde eseli eńbek etip júrgen telearna basshylary, irgeli basylymdardyń bas redaktorlary, kópke belgili jýrnalıster men telejúrgizýshiler, volonterler men qoǵamdyq uıymdardyń ókilderi jáne de ár salanyń kásibı mamandary qatysty. Mınıstr eńbegi janǵan názik jandardy merekelik Alǵys hattarmen marapattap, aq jarma tilegin aıtty.
«Qazirde telearnalar men gazet-jýrnaldardy, aqparattyq agenttikterdi basqaryp otyrǵan, jalpy BAQ salasynda ónimdi qyzmet etip júrgen arý áriptesterimizdiń sany kóptep sanalady. Sondaı-aq elimizdiń qoǵamdyq-saıası ómirine de belsene atsalysyp júrgen qyz-kelinshekter az emes. Bul óz kezeginde elimizdegi áıelder qaýymynyń qoǵamdaǵy róli arta túskeniniń aıqyn dáleli», dedi óz sózinde Darhan Qydyráli.