Azamattyq qyzmetshilerge, memlekettik bıýdjet esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesine ózgerister engizetin QR úkimetiniń qaýlysynyń jobasy daıyndaldy, dep habarlaıdy Egemen.kz.
Qujatta Qazaqstannyń memlekettik orman qorǵaý qyzmetteri qyzmetkerleriniń, tabıǵatty qorǵaý mekemeleriniń memlekettik ınspektorlarynyń jáne janýarlar dúnıesin qorǵaý, ormandardy kóbeıtý jáne orman paıdalaný jónindegi mamandandyrylǵan uıymdar ınspektorlarynyń, densaýlyǵy men ómirine zııan keltirý qaýpimen baılanysty balyq sharýashylyǵy, sý aıdyndaryn nemese ýchaskelerin qorǵaý boıynsha ósimin molaıtý kesheniniń kásiporyndaryna laýazymdyq jalaqysyn 100% mólsherinde kóterý qarastyrylǵan.
«Orman sharýashylyǵy qyzmetiniń tómen jalaqysy saıyp kelgende jumysshylardyń jıi aýysýyna, turaqty bos oryndarǵa, áleýmettik máselelerdiń sheshilmeýine ákelip soqtyrdy. 300-ge jýyq jumysshy jumys isteıdi. Kásiporyndar qyzmetiniń jáne olardyń aýyr eńbek jaǵdaılaryndaǵy jumysynyń ereksheligin eskere otyryp, qazirgi jalaqy mólsherlemeleri olardyń salany damytýǵa qosqan úlesine sáıkes kelmeıdi. Sonymen qatar turaqty jumys kúshin qalyptastyrýǵa jáne kadrlardy tartý arqyly kadrlyq resýrstardy nyǵaıtýǵa múmkindik bermeıdi», dep túsindirdi Orman sharýashylyǵy jáne janýarlar komıteti.
Jalaqyny kóterý úshin 2023-2025 jyldarǵa arnalǵan bıýdjetten jalpy somasy 38 mlrd teńgege qosymsha qarjy resýrsyn bólý josparlanyp otyr.
Qujat 30 naýryzǵa deıin qoǵamdyq talqylaý úshin Ashyq NQA veb-saıtyna jarııalanǵan.