Áleýmettik mańyzy bar azyq-túlik taýarlarynyń baǵasyn jiti nazarda ustaý, baǵa turaqtylyǵyn saqtaý máseleleri jergilikti ákimdik tarapynan qatań baqylaýǵa alynǵan. Shymkentte osyndaı áleýmettik azyq-túlik ónimderin saýdalaıtyn birneshe dúken bar. Sonyń biri – Shaıahmetov kóshesinde ornalasqan «Qaz et» áleýmettik dúkeni.
Qala turǵyndarynyń kópshiligi baǵasy tómen bolǵandyqtan etti osy dúkennen satyp alady. Munda sıyr eti 2 300 teńgeden satylyp jatyr. Naryqta onyń baǵasy kishkene qymbattaý. Atalǵan saýda núktesi 2022 jyldyń jeltoqsan aıynda ashylǵan bolatyn.
Shaharda taýarlardyń baǵasyn negizsiz ósirmeý jóninde birqatar iri saýda oryndarymen kelisimder jasalǵan. Búginde «Magným» saýda jelisinde áleýmettik mańyzy bar 19 taýarǵa belgilengen baǵa qoıylǵan. Dúkender ákimdik bekitken sol baǵadan asyrmaý kerek. Máselen, arzandatylǵan azyq-túlik taýarlarynyń arasynda nannyń baǵasy – 92 teńge, sheker – 445 teńge, pııaz – 225 teńge, sábiz – 180 teńge, kartop – 180 teńge, kúnbaǵys maıy – 860 teńge bolyp belgilengen.
Shymkent qalalyq aýyl sharýashylyǵy jáne veterınarııa basqarmasy azyq-túlik qaýipsizdigin qamtamasyz etý bóliminiń basshysy Jandos Hanıev áleýmettik eń qajetti degen azyq-túlik taýarlarynyń baǵasyna mindetti túrde monıtorıng jasalyp otyratynyn jetkizdi. Mamannyń aıtýynsha, búgingi tańda shahardaǵy azyq-túlik naryǵynda eshqandaı tapshylyq joq. Ákimdik tarapynan jergilikti kásipkerlermen 1 jylǵa kelisimshart túzilip, olarǵa aınalymǵa qarajat qaryz esebinde berilgen. Osy kúnde shaharda 100-den astam saýda nysandarynda áleýmettik mańyzy bar azyq-túlik taýarlary belgilengen baǵada satylyp jatyr.
Osy oraıda aıta ketken jón, baǵa belgilengenimen ár toqsan saıyn naryqtaǵy jaǵdaıǵa baılanysty ózgerip otyrady. Soǵan sáıkes ár toqsanda komıssııa sheshim shyǵaryp, naryqtaǵy baǵadan 10-15 paıyz tómen áleýmettik baǵa bekitiledi. Jalpy, alǵanda áleýmettik mańyzy bar azyq-túlik taýarlarynyń baǵasyna kúndelikti monıtorıng júrgizý jalǵasyn taba beredi.