Kentaýda aq kımeshek kıip, ulttyq qundylyǵymyzdy dáriptegen analar saılaý ýchaskesindegi baqylaýshylar men daýys berýshilerge naýryz kóje, baýyrsaq, qurt-irimshik úlestirdi, dep jazady Egemen.kz.
Osylaısha Kentaý qalalyq ardagerler uıymy janynan qurylǵan «Ájeler alqasynyń» tóraıymy Roza Jumabaeva bastaǵan ájeler kópshilikti Naýryz merekesimen quttyqtady.
«El úshin qyzmet etetin adamdardy tańdaý - el bolashaǵynyń jarqyny. Sol sebepti bul kún mańyzdy ári elimiz úshin mereke. Elimizde tek jaqsylyq ornasyn», dep Roza áje aq batasyn berdi.
Kentaý qalasynda 35 saılaý ýchaskesi jumys istep tur. Jalpy 56 172 saılaýshy daýys beredi dep kútilýde.
Al Sozaq aýdanynda Uly Otan soǵysynyń ardageri Myrzahmet Jylysbaev alǵashqylardyń biri bolyp Syzǵan aýyl okrýgindegi №701 saılaý ýchaskesine kelip, óz tańdaýyn jasady. Sanaly ǵumyryn aýdannyń damýyna jumsap, elge qyzmet etken ardager búgingi mańyzdy saıası naýqan joǵary deńgeıde, ádil ótsin dep bata berdi.
«El bolashaǵy úshin árbir azamat daýysy mańyzdy. Sondyqtan men de jasym 90-nan asqanyna qaramastan tańsáriden kelip óz tańdaýymdy jasap, saıası naýqannan shet qalmadym. Qashanda elimiz aman, beıbitshilik zaman bolsyn», dep aqsaqal izgi aq tilegin jetkizdi.
Aıta ketelik, alǵashqy daýys berýshi belsendi azamattarǵa saılaý ýchaskelerinde syı-sııapat jasalyp, merekelik quttyqtaýlar uıymdastyryldy.