Qazaqstannyń 15 óńirinde Májilis pen jergilikti máslıhattar depýtattaryn saılaý aıaqtaldy, dep habarlaıdy, Egemen.kz.
Astana ýaqytymen saǵat 18:00-degi jaǵdaı boıynsha saılaýshylar tizimine engizilgen respýblıkanyń 6 390 046 azamaty bıýlleten aldy. Bul jalpy saılaýshylardyń 53,11 paıyzyn quraıdy.
Qazirgi ýaqytta elimizdiń 5 óńirinde, atap aıtqanda, Aqtóbe, Atyraý, Batys Qazaqstan, Qyzylorda jáne Mańǵystaý oblystarynda daýys berý jalǵasýda. Bul óńirlerde saılaý ýchaskeleri elorda ýaqytymen saǵat 21-00-de jabylady.
Aıta keterligi, Qazaqstannyń 62 shet memlekettegi ókildikteri janynan 77 saılaý ýchaskesi ashylǵan bolatyn. Olarda 12 016 adam daýys berýi tıis. Astana ýaqytymen saǵat 18:00-de shetelderdegi 11 saılaý ýchaskesi jumysyn aıaqtady jáne qazir jumys istep jatqan ýchaskelerdi qosqanda shamamen 5 myń Qazaqstan azamaty daýys berdi. Bul 42 paıyzdy quraıdy. 66 ýchaske jumysyn jalǵastyryp jatyr. Jalpy sheteldegi daýys berý 20 naýryz kúni tańerteńgi saǵat 09:00-de San-Fransıskodaǵy saılaý ýchaskesinde aıaqtalady.
Ortalyq saılaý komıssııasy azamattardyń ýchaskelerge kelýi týraly saǵat 20:10-da jáne 22:10-da aqparat usynatyn bolady.