Ulytaý oblysynda Parlament Májilisi jáne barlyq deńgeıdegi máslıhattar depýtattarynyń saılaýyn ótkizýge 134 saılaý ýchaskesi jumyldy. Jalpy, oblysta 140 myń saılaýshy tirkelgen. Onyń shamamen 40 paıyzy oblys ortalyǵy Jezqazǵanda turady.
Al Jezqazǵandaǵy saılaý ýchaskesiniń sany – 33. О́ńirde de saılaý ýchaskeleri tańǵy jetide jumysyn bastady. Aımaqta daýys berý quqyǵyn endi ıelengen jastar da, neke qıǵan jas jubaılar da, elge úlgi-ónege bolyp júrgen qarııalar da saılaýǵa beıjaı qaraǵan joq. Mysty shaharda da halyq belsendilik tanytty. Tipti ulttyq kıim kıip kelip, daýys bergenderdiń qarasy kóp boldy. Aıtalyq, Jezqazǵanda on segizge tolǵan 209 jas tuńǵysh ret saılaýǵa qatysty. 100 jastan asqan 3 qarııanyń da daýysy esepke alyndy. Sonyń biri – ǵasyr jasaǵan Aıtqurman Qurmanbaev aqsaqal. Aıtqurman qarııa – 8 balasynan 35 nemere, 40 shóbere, 10 shópshek súıgen abyz.
«Men balalarǵa, aǵaıyn-týysqa habarlasyp, daýys berý qajettigin eskerttim. Memleketimizdi bıikke kóterý úshin úles qosyńdar dep aıtyp jatyrmyn. Elimizdiń bedeli artyp, búkil álemge tanyla túsýin qalaımyn. Bar tileýim sol», dedi Aıtqurman Qurmanbaev.
Ulytaý oblysynyń ákimi Berik Ábdiǵalıuly da Jezqazǵandaǵy №24 jalpy bilim beretin mekteptiń ǵımaratynda ornalasqan №213 saılaý ýchaskesinde daýys berdi. О́ńir basshysy bul oqıǵanyń mańyzdylyǵyn atap ótip, azamattyq ustanymyn belsendi kórsetkeni úshin oblys turǵyndaryna alǵysyn bildirdi.
Al Sátbaev qalasyndaǵy №286 saılaý ýchaskesinde daýys bergen qala turǵyny Ǵalym Toǵanov daýys berý ár azamattyń el aldyndaǵy mindeti deıdi.
– Búgin jubaıymyz ekeýmiz kelip daýys berdik. Saılaýǵa árbir azamat jaýapkershilikpen qaraýǵa tıis. Bul elimizdiń damýyna qosqan úles bolmaq. Elimiz órkendeı bersin. Daýys bergen úmitkerge zor senim artamyz, – deıdi Ǵalym Toǵanov.
Jańadan shańyraq kótergen Beıbarys Arystanbekov pen Arýjan Amanbekova da №302 saılaý ýchaskesine kelip daýys berdi.
– Búgin – elimiz úshin eń mańyzdy kún. Shańyraǵymyzdyń osy saıası ataýly kúnmen tuspa-tus kelip, kóterilgenine qýanyshtymyz. Ár azamattyń saılaýǵa qatysyp, daýys berýi – azamattyq boryshy. Sondyqtan da qazir toıymyz bolatynyna qaramastan daýys berýge arnaıy keldik, – deıdi jas jubaılar.
Aıtpaqshy, Ulytaý oblysynda saılaý kúni 10 náreste dúnıe esigin ashty. Olardyń beseýi – ul, beseýi – qyz. Nárestelerdiń 9-y – Jezqazǵanda, 1-eýi Sátbaev qalasynda ómirge kelgen.
Ulytaý oblysy