Jańadan saılanǵan Parlamenttiń alǵashqy sessııasynda Prezıdentimiz kótergen máselelerdiń barlyǵy mańyzdy dep sanaımyn.
Memleket basshysy buǵan deıingi Joldaýlary men aýqymdy jıyndarda aıtyp kelgendeı, adamı kapıtaldy damytýǵa erekshe mán beretinin baıqatty. Adam kapıtalyn damytý – ekonomıkalyq ósýdiń faktory. Qoǵamdaǵy áleýmettik qamtý salalarymen birge mádenıet, ádebıet, bilim men ǵylym qatar damýy kerek. Ustazdarymyzdyń mártebesin ári qaraı arttyrý kerek dep aıtty. Bul – óte mańyzdy másele. Buǵan deıin muǵalimder mártebesi týraly zańnyń qabyldanýyna oraı pedagogterdiń quqyqtary men jaýapkershilikterin aıqyndap aldyq. Halyqtyń ustazdarǵa degen qurmeti ósip, muǵalimderdiń el arasyndaǵy bedel, abyroıy ulǵaıa túskenine kýá boldyq. Dál osyndaı zańdy endi medısına salasynyń qyzmetkerlerine qatysty ázirleý kerektigin de tapsyrdy. Bul usynystar naqtylaı aıtqanda otandyq áleýmettik salany damytýǵa, adam resýrstaryn jetildirýge baǵyttalyp otyrǵany anyq. Adam kapıtalynyń sapasy artady. Ekinshi turǵydan, qoǵam arasynda talqyǵa túsip kele jatqan taqyryptardyń sheshimi tabylady. Emdelýshiler men dárigerler arasyndaǵy baılanys kommýnıkasııalary, ádepteri túziledi degen sóz.
Taǵy bir aıta keterligi, sonaý 1999 jyly alynyp tastalǵan «Qazaqstannyń Halyq ártisi» ataǵyn mádenıet salasyna qaıtarý osy sala ókilderiniń shyǵarmashylyǵyna shabyt syılap, talpynystaryna túrtki bolmaq. Mundaı joǵary ataqty tek úzdikter ǵana ıelenip, olardyń óneri jas urpaqty shabyttandyrady.
Jańa Parlamenttiń quramyndaǵy 28 depýtat buǵan deıingi shaqyrylymdarda bolǵan azamattar. Olar ózine senip tapsyrylǵan mindetti jalǵastyryp, tájirıbesi az áriptesterine qoldaý jasaýy kerek. Memleket basshysy zań shyǵarýshy organnyń aldyna aıtarlyqtaı mindetter men baǵyttar belgilep berdi. Endi solardy retimen oryndap, Ádiletti Qazaqstan qurý jolyna jumylsa abzal. Endi bir jarty jyldan keıin Májilistiń jumysy jaıynda belgili bir qorytyndylar jasaýǵa bolady degen oıdamyn.
Dáýren ǴAZIZ,
S.Toraıǵyrov ýnıversıteti saıasattaný ǵylymdarynyń magıstranty