11 sáýirden bastap Astanada arnaıy komıssııa óz jumysyn bastady. Onyń quramyna Energetıka mınıstrligi, Eńbek jáne halyqty áleýmettik qorǵaý mınıstrligi, «Samuryq-Qazyna» UÁQ AQ, «QazMunaıGaz» UK AQ ókilderi, sondaı-aq 10 adamnan quralǵan «BerÁli» kompanııasynyń belsendi toby kirdi, dep habarlaıdy Egemen.kz.
«QazMunaıGaz» taratqan málimetke sáıkes, búginge deıin jumys komıssııasy 3 otyrys ótkizgen.
− «BerÁli» kompanııasynyń burynǵy qyzmetkerleriniń basty talaby – «О́zenmunaıgaz» AQ shtatyna jumysqa ornalasý. Bastamashyl topqa bul sharttyń múmkin emestigi aıtyldy. Uıymǵa jumysqa kezekte 9 myń adam turǵany atap ótildi. Olar qabyldanǵan algorıtmderge sáıkes bastapqyda kommýnaldy kompanııalarda jumys isteıdi, ári qaraı bos jumys orny paıda bolǵanda kezek boıynsha «О́zenmunaıgazǵa» jumysqa turady. Kelissóz júrgizýshilerdiń bul talaby qala turǵyndarynyń múddeleri men quqyqtaryna qaıshy keledi, − delingen habarlamada.
Satyp alý qyzmetin uzaq merzimge belgileý máselesi boıynsha QMG ókilderi «3+2» shemasy boıynsha kelisimshart jasasýǵa daıyn ekenin bildirdi. Ol boıynsha kelisimsharttar qosymsha 2 jylǵa uzartý quqyǵymen 3 jylǵa jasalady.
Jekelegen máseleler boıynsha «BerÁliniń» burynǵy qyzmetkerleriniń talaptary ózgerdi: atap aıtqanda, jerasty jóndeý jumystarynyń qosymsha kólemin «Burǵylaý» jáne «MunaıFıldServıs» jeke kompanııalaryna berip, «BerÁliniń» burynǵy qyzmetkerlerin osy kompanııalarǵa jumysqa ornalastyrý múmkindigi aıtyldy. Alaıda aldyn ala kelissózderden keıin atalǵan kompanııalardyń basshylyǵy óz brıgadalarynyń tolyq júktelmeýine baılanysty mundaı qyzmet túrin kórsetýge qyzyǵýshylyǵy joqtyǵyn málimdedi.
«Eńbekti qorǵaý jáne uıymdastyrý jaǵdaılary, biryńǵaı tarıftik-biliktilik anyqtamasyn (BTBA) qoldaný jáne tender rásimderine qatysty máseleler boıynsha táýelsiz komıssııa qurýdy memlekettik organ ókilderi qarastyrýǵa jáne komıssııanyń kún tártibi men quramyn múddeli organdarmen keliskennen keıin jaýabyn berýge daıyn ekendikterin málimdedi.
Budan bólek, QMG ókilderi «BerÁli» kompanııasynyń burynǵy qyzmetkerleriniń barlyǵyn osyǵan deıingi jalaqysy men áleýmettik paketin saqtaı otyryp, konkýrs nátıjesinde jeńimpaz bolǵan kompanııaǵa jumysqa ornalastyrýǵa daıyn ekendigin rastady», delingen QMG habarlamasynda.
Qazir joǵaryda atalǵan máselelerdi talqylaý jalǵasyp jatyr jáne taraptar qoldanystaǵy zańnamaǵa saı kelisimge qol jetkizýge múddeli.
Eske sala keteıik, 10 sáýirde 60-70 munaıshy Energetıka mınıstrligi ǵımaratynyń mańynda narazylyqqa shyqqan bolatyn. Alaıda jumysshylar beıbit jıyn talaptaryn buzǵany úshin ustalǵan edi. Osydan keıin jumysshylardyń talaby tender talabymen saı kelmeıtini týraly Premer-mınıstrdiń orynbasary Altaı Kólginov pikir bildirdi. Jańaózen qalasynyń ákimi Aıbek Qosýaqov turǵyndarǵa úndeý jasady.
Al munaıshylardyń talaptaryna qatysty Energetıka mınıstrligi túsinikteme bergen. Vedomstvo bul másele eńbek zańnamasy men «Samuryq-Qazyna» UÁQ» AQ satyp alý qaǵıdalaryn eskere otyryp, zańnamalyq negizde sheshilýi tıis dep sanaıtynyn aıtqan.