О́skemendegi ADK saýda úıiniń ájethanasynda kámelettik jasqa tolmaǵan qyzdardyń buzaqylyǵy qoǵamda qyzý talqyǵa túsip jatyr. Búgin sol kıkiljińde jábir kórgen qyzdyń ápkesi Toǵjan Dosymova BAQ ókilderine suhbat berdi, dep habarlaıdy Egemen.kz.
Qazirgi tańda bul oqıǵa boıynsha tergeý júrgizilip jatyr. Dese de, jábir kórgen qyzdyń ápkesi resmı derekterde shyndyq ashyp aıtylmady deıdi.
«Sińlimdi soqqan qyzdardyń biri telegramda top ashqan. Oqıǵanyń bastaýy sol jerde. Uryp-soǵý ǵana emes, urlyq, bopsalaý da bar. Sińlim «ol aqshany ne isteısińder» dep suraǵanda, «osy túsirilgen vıdeony taratyp jibermes úshin» dep túsindirdi», dedi ádildik izdegen ápkesi.
Ápkesi Toǵjan Dosymovanyń aıtýynsha, sińlisi aýrýhanaǵa jatqyzylyp, eki apta emdelgen.
Sondaı-aq Bilim basqarmasy men Polısııa departamenti usynǵan málimettiń barlyǵy jalǵan ekenin aıtýda.
«Bilim basqarmasy men kolledj tarapynan eshqandaı shara qoldanylǵan joq. Beınejazba taraǵan soń mınıstrlikke shyǵyp, narazylyq bildirdim. Vıdeonyń barlyq jerden óshirilýin suradym», dedi Toǵjan Dosymova.
Al Bilim basqarmasy basshysy Inessa Chernyshevanyń aıtýynsha, jábirlenýshi tarap qandaı da kómekten bas tartqanyn aıtady.
«Beınejazba bar. Kolledj ákimshiligi qyzdyń densaýlyǵy bolmaı turǵanyn aıtqan. Zańgerlik kómek te usynyldy. Alaıda qyzdyń jaqyndary mundaı kómek alýdan bas tartqan. Qajet bolsa, qoldary qoıylǵan hattama bar», dedi Inessa Chernysheva.
Jábir kórgen qyzdyń ápkesi sottyń ádil sheshim shyǵaryp, soqqyǵa jyqqan qyzdardyń laıyqty jaza alýy tıis deıdi.