Qostanaıda «RealtyKST» avtoklavty gazblok zaýyty ashyldy. 70-ten astam adamdy jumysqa ornalastyrǵan kásiporyn jylyna qurylysqa qajet 75 myń tekshe metr ónim shyǵarmaq.
Qurylysy qarqyndy júrip jatqan Tobyl óńirine qabyrǵatastar negizinen Reseıden ákelinedi. Oǵan báseke bola alatyndaı jergilikti ónim az. О́ıtkeni shaǵyn sehtardan shyǵatyn jergilikti gazbloktyń arzanyraq bolǵanyna qaramastan, jurttyń kóbi sapasyna qyzyǵyp, Reseıdiń qymbat gazblogyn attaı qalap alyp jatady. Eń ótimdi taýar. Tipti jaz ortasy – qurylys maýsymynyń naǵyz qyzǵan shaǵynda qat bolyp ketetini de bar.
«RealtyKST» JShS endi sheteldik gazbloktan arzan ári sapaly ónim shyǵarýǵa bel býyp otyr. Kásiporyn basshysy Vıktor Shastlıvyıdyń aıtýynsha, jergilikti avtoklavty gazblok qum, sement jáne áktiń qospasynan jasalady.
– Biz shyǵaratyn bloktar ekologııalyq jaǵynan taza qurylys materıaldaryna jatady. Eger óndiris úderisi týraly aıtatyn bolsaq, qospa úsh saǵattyń ishinde qatady. Sodan keıin ony shıki kúıinde kesýge aparady. Ári qaraı 12 saǵatqa avtoklavqa jiberiledi. Baǵasy basqa gazbloktardan tómen, sebebi biz shıkizatty ózimizden alamyz. Mysaly, gıps pen ák Pavlodardan keledi, – deıdi zaýyt basshysy.
Jańa zaýyt ornalasqan úlken ǵımarat buryn bazalttan mıneraldy jylytqysh materıaldar jasap shyǵaratyn «Termomaster» dep atalatyn óndiris ornyna tıesili bolǵan. Indýstrııalyq-ınnovasııalyq damý baǵdarlamasy aıasynda iske qosylǵan bul joba qutty bolmady. Jumysyn bastamastan, sátsizdikke ushyrap toqyrap qaldy. О́ıtkeni zaýytqa dep arnaıy satyp alynǵan óndiristik qurylǵylar sapasyz bolyp shyqqan. Osylaısha, eńseli ǵımarat on shaqty jyl boıy qańyrap bos turdy.
Jańa kásiporynnyń basshylary aýdany 15 myń sharshy metr bolatyn alyp ǵımaratty jańartyp, qaıta beıimdep, óndiristi iske qosýǵa shamamen 2 mlrd teńge qarjy jumsaǵan.
«2021 jyly qurylys-montajdaý jumystary bastaldy. Ǵımaratty qalpyna keltirip, qural-jabdyqtardy ornatyp shyqtyq. Bıyl qańtar aıynda gaz bloktarynyń alǵashqy legin quıyp kórdik. Osylaısha, ónim kólemin arttyryp kele jatyrmyz. Endi, mine, óndiris tolyqqandy jumys istep tur. Qajet bolsa, az ǵana shyǵynmen óndiris kólemin jylyna 120 myń gazblokqa deıin arttyrýǵa múmkindik bar», deıdi Vıktor Shastlıvyı.
Bıyl óńirde 2,5 mln sharshy metr turǵyn úı salyp, 150 myń adamdy baspanamen qamtamasyz etý josparlanǵan. Oǵan qajet qabyrǵatastyń 70 paıyzyn «RealtyKST» seriktestigi shyǵaratyn bolady.
Qostanaı oblysy