Bul týraly Memleket basshysy elimizdiń áleýmettik-ekonomıkalyq damýy jónindegi keńes barysynda aıtty, dep habarlaıdy Egemen.kz Aqordanyń baspasóz qyzmetine silteme jasap.
«Qazaqstan – osy geosaıası aımaqta aýqymdy, demokratııany arqaý etken reformalar jolyna túsken birden-bir memleket. Sondyqtan bizge ońaı bolmaıdy. Biraq bul joldy qalaıda júrip ótýge tıispiz. Endi jumysqa jumyla kirisemiz.
Osynda otyrǵan árbir memlekettik qyzmetshi ózine orasan zor mindet júktelip otyrǵanyn sezinýge tıis. Bul – eń aldymen, barsha Qazaqstan halqynyń aldyndaǵy jaýapkershilik. Sizderdiń sheshimderińiz ben is-áreketterińiz eldiń búgini men bolashaǵyna tikeleı áser etedi. Sondyqtan kúndelikti máselelerdi shuǵyl sheshýmen ǵana shektelmeý kerek.
Sizder memleketshil-reformator bolýlaryńyz qajet. Reformalarymyzdyń túpki maqsaty – halyqtyń ómirin jaqsartý. Ol úshin turǵyndardyń tabysyn kóbeıtý kerek. Jaıly ómir súrýine jaǵdaı jasap, qaýipsizdigin qamtamasyz etý qajet. Azamattardyń ózin-ózi damytýyna barlyq múmkindik jasalýǵa tıis. Munyń bárin myqty naryqtyq ekonomıka bolsa ǵana, tabysty júzege asyra alamyz», dedi Prezıdent.
Memleket basshysynyń aıtýynsha, azamattardyń qajettilikterin qamtamasyz etýge baǵyttalǵan shynaıy naryqtyq ekonomıkaǵa kóshý qajet. Sondyqtan aldymyzda kúrdeli kezeń tur.
«Biz qıyn-qystaý zamanda ómir súrip jatyrmyz. Dástúrli ekonomıkalyq jáne logıstıkalyq baılanystar úzilip jatyr. Oǵan qosa ınflıasııa sharyqtap tur. Álem ekonomıkasynyń damý qarqyny tómendep ketti. Memleketter qaryzǵa belsheden batty. Saýda-sattyqqa kedergi kóbeıedi. Sondaı-aq elderdiń ózara senimi azaıyp barady. Munyń bári álem ekonomıkasyndaǵy qalypty jaǵdaıǵa aınaldy. Budan bylaı tabıǵı baılyq elimizdiń ornyqty damýyna negiz bola almaıdy», dedi Q.Toqaev.