20-21 sáýirde Máskeýde ótken EEK Keńesiniń eki kúndik otyrysynyń qorytyndysy boıynsha qazaqstandyq jetkizýshiler úshin saýda-ekonomıkalyq kedergilerdi joıý baǵytynda mańyzdy qadamdar jasaldy. Otyrysta memlekettik satyp alý, ózara saýda, tehnıkalyq jáne kedendik retteý, ónerkásip, energetıka, halyqaralyq yntymaqtastyq salalaryndaǵy 35-ten astam másele qaraldy, dep habarlaıdy Egemen.kz Úkimettiń baspasóz qyzmetine silteme jasap.
Qazaqstandyq delegasııany Qazaqstan Respýblıkasy Premer-mınıstriniń orynbasary – Saýda jáne ıntegrasııa mınıstri Serik Jumanǵarın basqardy.
Qazaqstandyq jetkizýshilerge EAEO elderiniń ónerkásiptik taýarlaryn memlekettik satyp alýǵa, onyń ishinde ST-1 sertıfıkatyn usyný arqyly kedergisiz qatysýǵa múmkindik beretin birqatar qujattarǵa ózgerister engizildi. EAEO-ǵa múshe memleketterden taýarlardyń shyǵý tegin aıqyndaıtyn óndiristik jáne tehnologııalyq operasııalardy júrgizý sharttarynyń tizbesi arnaıy mashına jasaý, medısınalyq maqsattaǵy buıymdar men munaı-gaz mashına jasaý taýarlaryna qatysty 38 pozısııamen tolyqtyryldy. Sonymen qatar mundaı sharttar qarastyrylmaǵan 174 taýar boıynsha EEK keńesiniń músheleri TMD aýmaǵynda taýardyń shyǵarylǵan elin aıqyndaý qaǵıdalarynda kózdelgen taýarlardy jetkilikti qaıta óńdeý ólshemderin qoldaný týraly sheshim qabyldady. Bul túzetýler EAEO elderiniń memlekettik satyp alý sheńberinde satyp alynatyn taýarlarǵa óndiristik jáne tehnologııalyq operasııalardy júrgizý úshin ulttyq sharttardy qoldaný tájirıbesin alyp tastaýǵa múmkindik beredi.
Veterınarııalyq baqylaý salasyndaǵy saýda kedergilerin teńestirý úshin Keńes músheleri 2019 jyldan beri Odaq alańynda talqylanyp kele jatqan másele boıynsha birtutas sheshimge keldi. Endi qatysýshylar janýarlardan alynatyn azyq-túlik ónimderinde ataýy joq veterınarııalyq dárilik zattar qaldyǵynyń quramyn tek tamaq ónimderiniń tehnıkalyq reglamentine standarttardyń biryńǵaı tizbesine engizilgen zertteý ádisterimen ǵana baqylaýdy uıǵardy. Bul EAEO-ǵa múshe memleketterdiń basqa elderde attestattalmaǵan kelisilmegen zertteý ádisteri arqyly saýda kedergilerin engizý táýekelderin azaıtýǵa múmkindik beredi.
Sondaı-aq Odaqqa múshe elderdiń birlesken ónerkásiptik kooperasııalyq jobalaryn iske asyrýǵa qarjylyq kómek kórsetý tásilderi maquldandy. Sheshim jobasynda qarjylyq kómek EAEO bıýdjeti esebinen halyqaralyq jáne ulttyq qarjy uıymdary beretin nesıeler men qaryzdar boıynsha syıaqy mólsherlemesin sýbsıdııalaý túrinde kórsetiletin bolady. Qujat EAEO-ǵa múshe memleketter basshylarynyń qol qoıýyna Joǵarǵy keńes otyrysynda usynylady.
EEK Keńesiniń kelesi otyrysy 2023 jylǵy 19 mamyrda ótedi.