Búgin Tashkentte Qazaqstan Respýblıkasy men О́zbekstan Respýblıkasy arasyndaǵy ekijaqty yntymaqtastyq jónindegi úkimetaralyq komıssııanyń 20-otyrysy ótedi, dep habarlaıdy Egemen.kz Úkimettiń baspasóz qyzmetine silteme jasap.
Onda memleketaralyq baılanystardyń keń aýqymdy máseleleri, atap aıtqanda, ónerkásip kooperasııasyn tereńdetý; aýyl sharýashylyǵy; tranzıttik-kólik salasy jáne basqa da baǵyttardaǵy ózara is-qımyl perspektıvalary talqylanbaq.
Qazaqstan tarapynan Premer-mınıstr Álıhan Smaıylov, О́zbekstan tarapynan О́R Premer-mınıstri Abdýlla Arıpov teń tóraǵalyq etedi.
Álıhan Smaıylovtyń О́zbekstan astanasyna jumys sapary «Iаngı Ýzbekıston» saıabaǵynda ornalasqan «Táýelsizdik» monýmentine gúl shoqtaryn qoıý rásiminen bastaldy. Onda beıbitshilik pen bostandyqtyń, izgilik pen ıgiliktiń belgisi retinde qanatyn jaıǵan Hýmo qusy beınelengen, al monýment tuǵyrynda «El tarıhynda óshpes iz qaldyrǵan ata-babalarymyzǵa máńgilik taǵzym» dep jazylǵan.